BARAZA LA MADIWANI LA SISITIZA STENDI YA TANGA ITUMIKE KWA KIWANGO TARAJIWA IFIKAPO 01. 01.2021

Tarehe ya kuwekwa: December 30th, 2020

Mradi  wa kituo cha Mabasi Tanga  uliojengwa kwa gharama ya shilingi bilioni 6.8 wenye  lengo mahususi la kufanya  uwekezaji  wa mradi kwa msingi na matumizi sahihi ya stendi ili iweze kutumika kwa kiwango tarajiwa   na  kupata faida iliyokusudiwa na Serikali pamoja na  jamii ya  Manispaa ya Songea.

Tamko hilo limetolewa na Mstahiki Meya Manispaa ya Songea Michael Leodgar Mbano akiwa katika baraza maalmu la madiwani wa Manispaa ya Songea lililofanyika katika ukumbi wa Manispaa ya Songea 29 disemba 2020.

Mbano,  ambaye pia ni Mwenyekiti wa baraza la Madiwani Manispaa ya Songea alisema lengo la kikao hicho ni kupitisha mapendekezo ya kuhamia stendi kuu ya Songea iliyopo shule ya Tanga  ifikapo 01 januari  2020 ambalo ni utekelezaji wa maelekezo ya Mh. Mkuu wa Mkoa wa Ruvuma ikifuatiwa na agizo la Mh. Waziri Selemani Jafo  akiwa ziarani Mkoani Ruvuma  23 disemba mwaka huu ambapo miongoni mwa miradi aliyotembelea ni pamoja na kituo  kikuu cha mabasi  Tanga.

Awali katika kutekeleza maagizo hayo aliitisha kikao cha wadau  wa umiliki wa vyombo vya usafirishaji abiria, vongozi wa wasafirishaji abiria (UWARU), Pamoja na  Afisa usalama barabarani Mkoa wa Ruvuma, Afisa mfawidhi wa LATRA, Meneja wa TARURA pamoja  na wadau wengineo kwa lengo la kuwashirikisha katika matumizi sahihi ya Stendi. “ Alisisitiza Mbano”.

Naye Mchumi Manispaa ya Songea  Andambike B. Kyomo alisema “ Halmashauri imeleta mapendekezo hayo kwa  mabasi yote yanayokwenda  dar es- salaam,  njombe, Iringa, Mbeya, Sumbawanga, Dodoma kupitia barabara ya Njombe safari zao zitaanzia na kuishia stendi kuu  ya  Tanga na wote wanatakiwa kushuka stendi ya Tanga.

Kyomo aliongeza kuwa Mabasi yote yanayofanya safari zake kupitia barabara ya Lindi kwenda dar es- salaam, lindi, Mtwara, Tunduru na Masasi yataanzia na kumalizia safari zake stendi kuu ya Tanga isipokuwa yatakuwa yanapakia na kushusha abiria kwa dakika tano 5 tu katika Stendi ya Seedfarm kwa muda, wakati inapoandaliwa barabara ya kuunganisha Mletele na stendi ya Tanga.

Pia Mabasi yote yanayoelekea Mbinga, Nyasa, na Songea Vijijini safari zake zitaanzia na kumalizia Stendi ya Tanga, yanapokwenda na kurudi yatatakiwa kupita barabara ya Bombambili-Matarawe hadi mwembechai na yataruhusiwa kushusha na kupakia stendi ya Ruhuwiko.

Aidha, magari yanayoanzia safari zake makambako, Njombe, Mavanga, Mateteleka, Wino, Ifinga na madaba safari zao kuishia stendi ya Tanga na kuondokea stendi ya Tanga. Pia mabasi yote yanayokwenda nje ya Mkoa yataanza safari saa 12.00 asubuhi na yanatakiwa kuwepo stendi ya Tanga saa 11: 00 alfajiri kila siku kwa ajili ya kurahisisha kukaguliwa na kikosi cha usalama barabarani.

Daladala za Mletele zitamalizia safari zake stendi ya daladala Mfaranyaki, pia Magari yanayokwenda Peramiho yataanza safari zake stendi kuu ya Tanga  kupitia stendi ya Mfaranyaki kwa dakika tano tu, pia  ukomo wa daladala zote za  Mshangano utakuwa stendi kuu ya Tanga.

Alisema ili kurahisisha upatikanaji wa huduma za kijamii ndani ya stendi  tunahamasisha wafanyabiashara ili waweze kuwekeza  katika maeneo hayo ili huduma ziweze kupatikana muda wote.

Akizitaja faida zitakazopatikana baada ya mabadiliko hayo ni  matarajio ya  makusanyo ni  jumla ya shilingi 580,500,000/=  ikilinganishwa na mapato ya sasa ambayo ni 165,780,00/=. Umetolewa  Wito kwa vyombo vya usalama  kuhakikisha wananchi wanafika stendi kuu ya Tanga kwa usalama nyakati za usiku na alfajiri.

Baada ya kusema hayo, baraza la madiwani likiongozwa na Mwenyekiti wa baraza hilo walisema” wamekubali  mapendekezo yaliyotolewa na wataalamu na wamekubaliana kwa pamoja  kubadilisha matumizi ya Stendi ya Msamala kuwa soko la Mazao ya nafaka.

IMEANDALIWA NA;

AMINA PILLY;

 AFISA HABARI MANBISPAA YA SONGEA.

30 disemba 2020.