BARAZA la Taifa la Uwezeshaji wananchi Kiuchumi latoa vyeti vya ujasiriamali kwa vijana 53 Songea

Tarehe ya kuwekwa: August 12th, 2019

VIJANA 53 wa Mkoa wa Ruvuma, wamepewa vyeti vya mafunzo ya ujasiriamali ambayo yamefundishwa ndani ya siku tatu watalaam wa Baraza la Taifa la Uwezeshaji wananchi kiuchumi(NEEC), ambalo lipo chini ya ofisi ya Waziri Mkuu(kazi,vijana,Ajira na wenye ulemavu).

Akizungumza baada ya kukabidhi  vyeti hivyo katika hafla iliyofanyika kwenye ukumbi wa Manispaa ya Songea, Afisa Maendeleo ya Vijana Mwandamizi wa OWM-KVAU Godfrey Massawe amesema vijana wengi wamejiingiza kwenye biashara ila hawana elimu ya kuweza kuendeleza  biashara.

Amesema hali hiyo imesababisha NEEC kuanza  kufundisha  elimu ya kujitambua kwa mjasiriamali,pia vijana hao wameunganishwa na fursa mbalimbali za uwezeshwaji katika biashara zao.

Massawe ameyataja malengo ya kuwakutanisha vijana na Taasisi ambazo wanaweza kukutana nazo ili kuweza kufanya kazi nao na kutatua changamoto zao katika matatizo ya mtaji, namna ya kuweza kukuza biashara na kupata vifaa vya kutumia katika kazi zao.

“Tunafanya kazi kwa ukaribu  na secretary ya Mkoa, maafisa biashara, tunao waratibu wa dawati la uwezeshaji wananchi kiuchumi katika ngazi za Mkoa na Halmashauri, wao ndio wamewabaini hawa vijana wanaohitaji haya mafunzo tunawapa majukumu ya kuweza kuwafuatilia baada ya miezi mitatu  katika biashara zao ili kujua kile tulichofundisha wamepiga hatua gani’’,alisisitiza Massawe.

Janeth Otilia ni mmoja wa wajasirimali wadogo aliyebahatika kushiriki katika mafunzo hayo,ameipongeza serikali kwa kugharamia mafunzo hayo,ambayo amesema yatasaidia  kufungua fursa mpya za kibiashara hivyo kufanya biashara zenye tija na ufanisi wa hali ya juu na kwamba yupo tayari kutoa mafunzo ya ujasiriamali kwa vijana wenzake ambao hawakupata fursa hiyo.

Hata hivuyo  Otilia ameiomba Serikali kuendelea kutoa elimu ya ujasirimali na biashara hadi vijijini ili kuweza kuwasaidia vijana wa vijijini kuondokana na changamoto ya ajira na mimba za utotoni.

Naye,Kaimu Mkurugenzi Mtendaji wa Kiwanda cha Matogoro stick industry a Richard Greyson amesema atajitahidi kutoa elimu kwa wajasiriamali wenzake  ili  kupata  faida ambayo amepata na kutumia fursa ambao wamefundishwa  kutoka Taasisi mbalimbali zikiwemo TRA,TBC,OSHA na  PASS.

Mkoa wa Ruvuma ni miongoni mwa mikoa nane hapa nchini ambayo imepata fursa ya vijana kufundishwa program ya ujasirimali na biashara ambapo mafunzo hayo yanatarajia kunufaisha vijana 153 kutoka katika Mkoa wa Ruvuma.

Imeandikwa na Farida Mussa

Wa Kitengo cha TEHAMA Manispaa ya Songea

Agosti 12,2019.