FAHAMU kanisa Anglikana lilivyoingia Nyasa

Tarehe ya kuwekwa: April 1st, 2018

DINI iliyoanza kuingia katika wilaya ya Nyasa mkoani Ruvuma ni dini ya Kikristo,Mwinjilisti wa kwanza wa Anglikana William Parcival Johnson alianza kuhubiri Februari 9,1881 na alihamia rasmi Liuli mwambao mwa ziwa Nyasa mwaka 1906.

 Mwinjilisti Johnson alifariki Oktoba 11,1928 na kuzikwa ndani ya Kanisa la Msalaba  Liuli ambalo ndiyo kanisa kuu la Dayosisi ya Anglikana Ruvuma.Hata hivyo wakati huo ilitambulika kwa jina la Dayosisi ya Nyasaland,ikafuatiwa na Dayosisi ya Southwest Tanganyika ilipofika Julai saba, 1952 na baadaye iliitwa Dayosisi ya Ruvuma Julai pili,1971.

Kwa mujibu wa Askofu wa Anglikana Dayosisi ya Ruvuma Mhashamu Raphael Haule tangu kuanzishwa kwa Dayosisi hiyo mwaka 1971 kwa mara ya kwanza kanisa hilo mwaka 2017 limebariki na kutamka rasmi kwamba makao makuu ya Dayosisi hiyo yapo Liuli.

Anasema kanisa kuu la Dayosisi ya Ruvuma lilikuwa katika kisiwa cha Likoma nchini Malawi na kanisa kuu shirikishi lilikuwa Liuli Tanzania ambapo Septemba 25,2017,kanisa kuu la Msalaba la Liuli lilibarikiwa kwa ibada maalum ambayo pia ilishirikisha viongozi wa kanisa toka kisiwa cha Likoma nchini Malawi.

Kulingana na Mhashamu Haule Dayosisi ya Ruvuma ina makanisa 135 na mitaa(parokia) 44  na kwamba kanisa lina changamoto kubwa ya mapadre hali ambayo inasababisha padre mmoja kuhudumia makanisa mawili hadi matatu.

“Dayosisi ya Ruvuma imetulia,mitaa yote inafanyakazi za miradi mbalimbali ya kanisa ikiwemo ujenzi wa makanisa na miradi mingine ya maendeleo,tunamuomba Mwenyezi Mungu aendelee kuibariki Dayosisi yetu,tuombeane amani, upendo na umoja ili kuimarisha ushirikiano’’,anasisitiza Mhashamu Haule.

• Historia ya kuingia kwa dini mwambao mwa ziwa Nyasa inaonesha kuwa,Kanisa Katoliki liliingia mwaka 1912 huko Nkaya na kuanzisha Parokia na baadae kujenga kanisa kubwa la Lituhi mwaka 1939. Mwanzilishi akiwa ni Padre Henrich Kunster.
• Kwa mujibu wa historia hiyo,Uislamu uliingia Nyasa mnamo mwaka 1928, Sheikh wa kwanza aliitwa Mzee Bin Amanzi, Ilipofika mwaka 1932 Waasisi walijenga msikiti ambao miongoni mwao ni Twaib Abidallah, Akida Wabu, Mdoka, Ajali Hassan, Mfaume Bolin na Issa Kimambe.
•  

Imeandaliwa na Albano Midelo

Afisa Habari na Mawasiliano Manispaa ya Songea