HALI YA UTAPIAMLO MANISPAA YA SONGEA YAFIKIA ASILIMIA 0.1%

Tarehe ya kuwekwa: August 25th, 2022

Na; 

Amina Pilly;

25 Agosti 2022

Mkurugenzi wa Manispaa  ya Songeaa  Dkt. Frederick Sagamiko amewataka wataalamu wa idara ya mifugo na uvuvi kuweka kituo cha kukusanyia maziwa kwa lengo la kufanya  kuhakiki ubora wa maziwa ili kuwalinda walaji wa Manispaa ya Songea.

Hayo yamebainishwa leo tarehe 24 Agosti 2022 katika kikao cha kamati ya lishe ya Halmashauri kilichofanyika katika ukumbi wa Manispaa ya Songea ambacho kilihudhuriwa na wataalamu wa mbalimbali ikiwa nisehemu ya utekelezaji wa  robo ya nne ya mwaka 2022  kwa lengo la kufanya tathimini ya utekelezaji wa shughuli za lishe.

Dkt.Sagamiko alisema ili kuweza kukabiliana na utapiamlo ni lazima kutekeleza mikakati ambayo itasaidia kuondoa au kupunguza tatizo la utapiamlo kwa kufanya ufuatiliaji wa akina mama wajazito ambao uhudhuria kliniki na kupata elimu ya Lishe  ambayo husaidia  kuondoa tatizo la kujifungua mtoto mwenye  uzito  chini ya kilo 2.5.

 Amewarai wakuu wa shule zote zilizopo  Manispaa ya Songea kuweka bustani za Mboga mboga, pia  Wazabuni wote ambao hupeleka  chakula shuleni “mafuta ya kupikia, unga, na chumvi”  wanatakiwa kuongeza virutubisho  lishe  kwenye chakula  ili kujenga afya za wanafunzi jambo ambalo linawezekana  na agizo hili  linatakiwa kutekelezeka mara moja. Dkt. Sagamiko alisisitiza.

Alisema Manispaa ya Songea  imelenga  kutekeleza  mpango Mkakati  kwa kushirikiana na wadau mbalimbali kwa kuweka kituo cha kulelea watoto wadogo “Day Care” kituo ambacho kitasaidia  wananchi ambao kipindi cha masika ya mvua huenda kushiriki shughuli za kilimo cha shambani ambapo watoto  wao wataweza kutunzwa kituoni hapo na kupata uangalizi wa kariibu  ambapo itasaidia kupunguza tatizo la utapiamlo.

 Naye  Afisa Lishe Manispaa ya Songea Florentine Kissaka alisema katika kupambana na udumavu na utapiamlo, kitengo  kilifanya uchunguzi wa hali ya lishe kwa kutumia mzingo wa mkono kwa watoto walio chini ya miaka mitano pamoja na upimaji   wa uzito na umri wa mtoto.

Kissaka alisema hali ya lishe  katika robo ya nne ya mwaka 2022 jumla ya watoto 32,492 wenye umri wa chini ya miaka mitano walichunguzwa hali ya lishe kati ya watoto 32,216 sawa na asilimia 100.8%  na kati yao watoto 33 waligundulika kuwa na utapiamlo mkali ambao ni sawa na asilimia 0.1%. Aidha watoto 790 ambao ni sawa na 2.4% waliochunguzwa waligundulika kuwa na utapiamlo wa kadiri,  pamoja na watoto 31,690waliochunguzwa sawa na 97.5% hawakuwa na utapiamlo.  Alibainisha.

Aliongeza kuwa watoto wote waliogundulika na utapiamlo wa kadiri walipewa unasihi wa uandaaji wa chakula na mpangilio wa ulaji unaofaa, pia watoto wote waliokuwa na utapiamlo mkali walipewa rufaa kwenda hospitali ya rufaa Songea kwa matibabu ya utapiamlo (SAM – Management).

Alisema Manispaa ya Songea  inaendelea na zoezi la ufuatiliaji na upatikanaji wa mbegu bora za viazi lishe na kufanya utafiti wa maeneo ambayo yanafaa kwa kulimwa mazao ya aina mbalimbali ili kuwa na uzalishaji mkubwa pamoja na kuweka mpango mkakati wa kuongeza vikundi vya ufugaji wa wang’ombe ili mazao ya maziwa yaweze  kupatikana  kwa wingi zaidi.

Mwisho.