LISHE DUNI HUSABABISHA UTAPIAMLO "UDUMAVU"

Tarehe ya kuwekwa: June 26th, 2020

Kauli hiyo imetolewa na Kaimu Mkurugenzi Manispaa ya Songea Alto Liwolelu  katika kikao cha Kamati ya Lishe cha kawaida  kilichofanyika tarehe 25/06/2020.

Alto alisema “ Lishe bora maana yake ni kula chakula cha kutosha na chakula kinachofaa ili kiweze kuusaidia mwili kukua vyema, kwa afya njema  na kuweza  kupigana na magonjwa mwilini. Aliongeza kuwa Utapiamlo ni  lishe mbaya na hutokea ikiwa unakula chakula kidogo sana/ kingi sana/ au kula chakula kisichokuwa  na lishe ya kutosha.”

Alifafanua kuwa Lengo la Mradi  Elimu ya Lishe  ni kutoa Elimu ya Lishe kwa Jamii  hususani hunyonyeshaji wa maziwa ya mama pekee kwa muda usiopungua miezi sita ya awali au zaidi, utumiaji wa chakula bora , Kutoa elimu ya Udumavu  kwa jamii, kufahamu makundi ya vyakula na mpangilio wa mlo kwa siku.

Naye Mganga Mkuu Manispaa ya Songea Amos Mwenda  alifafanua kuwa katika kipindi cha January-March 2020 Halmashauri ya Manispaa ya Songea imepambana na Udumavu pamoja na Utapiamlo na kufanya uchunguzi wa hali ya Lishe kwa  kutumia Mzingo wa Mkono kwa Mtoto chini ya miaka mitano “5” kama ifuatavyo; Waliochunguzwa hali ya lishe ni (18,848), Waliogundulika kuwa na Utapiamlo  Mkali ni (15) sawa na 0.1%, Waliogundulika kuwa na Utapiamlo wa Kadiri ni (37) sawa na 0.2%, Wasiokuwa na Utapiamlo (18,796) sawa na 99.7%. 

Mwenda,  akibainisha baadhi ya Mikakati waliyojiwekea ili kupambana na Utapiamlo na Udumavu Manispaa ya Songea ni pamoja na Kutoa Elimu ya ulishaji wa chakula kwa  Watoto Wachanga/ Wadogo  kwa kupitia RCH Kliniki pamoja na Watoa huduma CHW, kutoa Elimu kwa akina mama wajawazito mara tu wahudhuriapo kliniki, kutoa Elimu ya uhifadhi salama wa chakula kwa kupitia Vyombo vya Habari, kutoa Elimu ya umuhimu wa kuwa na  choo bora,  uwekaji wa miundo mbinu ya kunawa mikono na Sabuni nje ya choo, kutibu Maji ya kunywa, pamoja na utoaji wa matone ya Vitamin A kwa watoto. nk.

Aliongeza kuwa  pamoja na mikakati  waliyojiwekea,  Manispaa ya Songea inaendelea kutoa elimu ya uzalishaji bora wa mazao ya chakula, mifugo na uvuvi,  Kilimo cha mboga mboga,  kwa kupitia  vikundi vya wanawake, Vijana, na Walemavu  ili waweze  kukopa mikopo  yenye riba nafuu inayoendelea kutolewa na Serikali  kupitia Maendeleo ya Jamii  kwa lengo la kuwasaidia wajasiliamali wadogo wadogo  kukuza  mitaji yao na kujipatia kipato katika familia. Alisema Kwasasa Mikopo hiyo  inaendelea kutolewa kwa kupitia  vikundi vya Wanawake 4%, Vijana 4%, na Walemavu 2% sawa na 10% ambayo ni  makusanyo ya mapato ya ndani ya kila mwezi.

IMEANDALIWA NA; 

AMINA PILLY 

KAIMU AFISA HABARI- MANISPAA YA SONGEA.