MANISPAA ya Songea ina viwanda zaidi ya 500

Tarehe ya kuwekwa: September 14th, 2018

HALMASHAURI ya Manispaa Songea mkoani Ruvuma ina jumla ya viwanda 512 vilivyopo katika baadhi ya kata zilizopo katika Halmashauri ya manispaa hiyo.

Kati ya viwanda hivyo kiwanda kikubwa ni kimoja  ambacho ni cha kusindika tumbaku kinachomilikiwa na  Chama cha Ushirika cha SONAMCU ambacho kwa sasa hakifanyi kazi na mchakato wa kukifufua unaendelea.

Viwanda vingine ni viwanda vya kati  ambavyo vipo tisa, viwanda vidogo vipo  132 na viwanda vidogo sana ni 371.

Hata hivyo viwanda  hivyo vya kati,vidogo  na vidogo sana ni vya   kukamua mafuta ya alizeti, usindikaji wa Mihogo, usindikaji wa mboga mboga na Matunda, kukoboa Mpunga na viwanda vya  kukoboa na kusaga nafaka.

Katika hatua nyingine ya maendeleo Halmashauri ya Manispaa ya Songea imepima viwanja 150  katika eneo la kata ya Lilambo kwa ajili ya uwekezaji hususani kwenye sekta ya viwanda. 

Hivi sasa Halmashauri ya Manispaa ya Songea inaandaa mradi wa kimkakati ili kujenga soko la kisasa la Manzese ambalo litaboresha huduma kwa wananchi pamoja na kuiletea mapato Halmashauri ya Manispaa ya Songea.

Imetolewa na Albano Midelo

Afisa Habari wa Manispaa ya Songea

Septemba 14,2018