MANISPAA YA SONGEA KUTEKELEZA KILIMO CHA PAMOJA - BLOCK FARMING

Tarehe ya kuwekwa: October 5th, 2021

Na  AMINA PILLY

      AFISA HABARI – MANISPAA YA SONGEA

Halmashauri ya Manispaa ya Songea  imeweka mkakati wa utekelezaji wa Sera, Programu ya kilimo cha Kibiashara   na Manufaa kwa Wananchi  ambapo ili kufanikiwa utekelezaji wa mkakati huo Manispaa ya Songea  imeweka utaratibu wa uanzishwaji wa kilimo cha Pamoja (Block Farming) kwa wakulima wa Manispaa ya Songea, chenye  ukubwa wa mashamba kuanzia ekari 500 na zaidi.

Utekelezaji wa Mkakati huo umetokana na agizo la Mkuu wa Mkoa wa Ruvuma Balozi Brigedia Jenerali Wilbert Ibuge ambaye ameelekeza Halmashauri zote Mkoani Ruvuma kuandaa na kuanzisha kilimo cha Mashamba Makubwa kuanzia  ekari 500 na Zaidi  (Block Farming), ambapo kutokana na Master Plan ya Manispaa ya Songea, Maeneo yaliyo ainishwa kwa shughuli za kilimo hicho yanapatikana  katika  kata nne (4) ambazo ni Tanga, Lilambo, Mletele na Subira.

Block Farming ni mfumo/utaratibu wa kulima kwa pamoja kwa kuunganishwa mashamba na kuwa katika block moja ambapo wakulima wanapatiwa huduma za kilimo ikiwemo pembejeo, huduma za ugani, zana za kilimo, na kupewa mafunzo kwa pamoja.

Kwa mujibu wa maelekezo hayo, mashamba Makubwa (Block Farming) ya pamoja  yatawawezesha wakulima  kupata huduma za ugani, matumizi ya zana bora za kilimo pamoja na misaada mingine ikiwemo miundombinu wakiwa katika eneo moja kubwa.

Amewataka  wananchi wote wa Manispaa wenye maeneo makubwa  kuanzia hekari 500 na zaidi, wajitokeze kwa wingi ili  kushiriki  kilimo cha pamoja  kwa mazao ya Soya na alizeti ambazo zitasaidia kukuza uchumi kijamii na Taifa kwa ujumla.

 Endapo  Mkulima hatakuwa na uwezo wa  kulima Hekari zote moja kwa moja anashauriwa kushilikiana na wakulima wengine wenye mashamba ili kutafuta wawekezaji, au taasisi mbalimbali zikaja kulima katika maeneo hayo kwa makubaliano maalumu na utaratibu mzuri ambao utaleta mafanikio.