Mh. Diwani Kata ya Mjimwema Manispaa ya Songea kutatua kero za Wananchi Wake.

Tarehe ya kuwekwa: June 13th, 2021

Mheshimiwa  Diwani wa Kata ya Mjimwema Sylivester Mhagama amefanya ziara ya siku tano katika kata yake yenye jumla ya mitaa mitano kwa ajili ya  kusikiliza na kutatua kero mbalimbali zinazowakabili wananchi wa kata yake hususani  miundombinu ya barabara.

Ziara hiyo ilianza kufanyika tarehe 07/06/2021 na kuhitimishwa  tarehe 11/06/2021 katika uwanja wa ofisi ya kata ya Mjimwema,  akiwa ameambatana na Meneja wa  Wakala wa barabara za mjini na vijijini (TARURA) Manispaa ya Songea Daudi Sweke ambaye ametumia ziara hiyo kwa  kutoa elimu kwa wananchi kwa lengo la kuwajengea  uelewa wakutosha  wananchi kuhusiana na majukumu ya TARURA pamoja  na kupokea changamoto mbalimbali zinazojitokeza kwa wananchi kuhusiana na  miundombinu ya barabara.

Akizungumza wakati wa kikao hicho Meneja wa TARURA Manispaa ya Songea Daudi Sweke amesema kwamba jukumu lao kubwa ni kuhakikisha wanaboresha miundombinu ya barabara katika eneo la Manispaa ili wananchi waweze kuepuka  na changamoto zinazojitokeza katika utoaji wa huduma za usafiri hasa katika kipindi cha masika kutokana na ubovu wa miundombinu.

Sekwe amewataka wananchi kuacha kutupa taka  kwenye mifereji ya barabara za mitaa pamoja na kupanda miti kwenye maeneo ya barabara ili kuepuka usumbufu unaojitokeza wakati  unapofanyika uboreshaji wa barabara hizo kwa kuongezeka gharama kwa ajili ya kung’oa visiki vya miti iliyopandwa.

Aidha ametoa rai kwa  wananchi kuendelea  kutoa ushirikiano kwa wakandarasi  mara wanapotengeneza miundombinu ya barabara ili kuondoa malalamiko au migogoro ambayo inaweza kukwamisha wakati wa utekelezaji wa zoezi hilo.pia   amehaidi kufikia tarehe 30 ya mwezi Julai 2021 barabara zote zenye changamoto ambazo zimewasilishwa TARURA na Mheshimiwa Diwani Mhagama kata ya Mjimwema zitakuwa zimetengenezwa.’ Sekwe alieleza’ 

Katika kuhakikisha anafanya miradi mbalimbali ya maendeleo katika kata yake Mheshimiwa Diwani Mhagama ameandaa ligi ya mchezo wa mpira wa miguu kwaajili ya vijana wa Kata ya Mijmwema ‘Diwani Cup’ iliyozinduliwa rasmi na Mheshimiwa Mstahiki Meya wa Manispaa ya Songea Michael Mbano  huku mshindi wa kwanza akipewa zawadi ya Tshs. 200,000 pamoja na zawadi mbalimbali kwa mchezaji bora, golikipa bora na mfungaji bora.

IMEANDALIWA NA,

AMINA PILLY,

AFISA HABARI MANISPAA,

13.07.2021.