MKUU wa Wilaya ya Songea aagiza wanaume kushiriki katika usafi wa mazingira

Tarehe ya kuwekwa: July 29th, 2019

MKUU wa Wilaya ya Songea mkoani Ruvuma Pololet Mgema amewaongoza wakazi wa Kata ya Matarawe Manispaa ya Songea katika kufanya usafi wa Mazingira  Jumamosi ya Mwisho wa Mwezi Julai.

Akizungumza baada ya kazi ya usafi kukamilika,amesema hajafurahishwa na kitendo cha  wanaume kutokufanya usafi na kusema usafi ni jambo jema kwa kila mtu ili kuhakikisha tunatokomeza magonjwa yanayotokana na uchafu.

 “Usafi unasaidia kupunguza magonjwa ya kipindupindu ili kuhakikisha Taifa letu linakaa katika mazingira salama na kazi ya watendaji ni kuhakikisha wanawapangia maeneo  wananchi ya kufanyia usafi”.amesema Mgema.

Awali Wananchi wa Matarawe  walitoa kero zao kwa Mkuu wa Wilaya  wakidai  gari taka kuchukua muda mrefu kufika katika eneo lao.

Akijibu kero hiyo Mkurugenzi wa Manispaa ya Songea Tina Sekambo aliitaja changamoto  inayosababisha magari ya kubebea taka kuchelewa kuwa baadhi  ya magari yanakuwa mabovu,hata hivyo amewaahidi wakazi kuwa ofisi yake itayatafutia ufumbuzi changamoto ya ubovu wa magari inayochangiwa na kuchelewa kufunguka kwa mifumo.

Imeandikwa na Farida Musa

Kitengo cha TEHAMA Manispaa ya Songea.