MPINGO UMESALIA KATIKA NCHI MBILI DUNIANI

Tarehe ya kuwekwa: December 7th, 2017

Mpingo ni mti ambao umeadimika sana duniani ,miaka ya karibuni ulikuwa unapatikana kusini mwa Ethiopia na Kenya.

Wataalam wa miti wanasema  hivi sasa mpingo unapatikana nchini Tanzania na kaskazini mwa nchi ya Msumbiji.

Inaaminika  kuwa mpingo ndiyo mti wenye thamani kubwa zaidi duniani, ambapo kwa sasa unagharimu zaidi ya  dola 25,000 kwa mita moja ya ujazo.  

Licha ya kwamba mpingo haujawa miongoni mwa miti iliyopo hatarini kupotea duniani,unavunwa katika hali isiyokuwa endelevu.

Mti huo  kimataifa unawekwa kuwa moja ya Viumbehai Waliopo Hatarini Kutoweka,ambapo unaweza kupotea kabisa katika kizazi kimoja au viwili kama hakuna hatua ambazo zitachukuliwa kuuokoa.

Kwa mujibu wa Sebastian Chuwa,Mtaalam wa mimea anasema Mti wa mpingo unakua polepole mno ambao unachukua kati ya miaka 50 hadi 70 kukomaa na kuanza kuvunwa hivyo unatakiwa kuhifadhiwa.

Pamoja na kwamba Wizara ya Maliasili na Utalii ya Tanzania imezuia usafirishaji wa mpingo nje,hata hivyo mti huo unaendelea kuvunwa kwa kasi kubwa, hasa katika upande wa kusini kwa Tanzania.

Inakadiriwa kuwa kuna miti ya mpingo chini ya milioni tatu iliyosalia barani Afrika, mingi ikiwa nchini Tanzania na kaskazini mwa Msumbiji.

Imeandaliwa na Albano Midelo

Afisa Habari Ruvuma