MRADI wa ujenzi wa lami nzito Manispaa ya Songea uliogharimu sh.bilioni 13 wafikia asilimia 90

Tarehe ya kuwekwa: October 1st, 2019

MANISPAA ya Songea ni miongoni wa Halmashauri 18 Tanzania zinazotekeleza miradi ya uendelezaji na uboreshaji wa Miji na Manispaa. (Urban Local Goevernment Strengthening Program) 

 Ujenzi wa  barabara hizi  ulianza Julai mosi,2015 na ulitarajiwa kukamilika Juni 30,2016.Mradi huu umetekelezwa na Wakandarasi  wawili, ambapo mara ya kwanza ujenzi ulifanywa na Mkandarasi M/S Lukolo Company  LTD aliyeingia mkataba na Halmashauri wa kujenga KM 8.6 za barabara kwa kiwango cha lami nzito kwa gharama ya  shilingi 14,320,586,464.39 ikijumlishwa na VAT.

Mkurugenzi wa Halmashauri ya Manispaa ya Songea Tina Sekambo amesema gharama hiyo ya mkataba  ilifanyiwa mapitio(revised contract ) na kufikia Tshs 11,933,899,897.09 ikijumlishwa na VAT. 

“Muda wa Mkataba ulikuwa ni miezi 24, ambapo  mkataba ulivunjwa tarehe 09/10/2017 baada  ya Mkandarasi kushindwa kukamilisha kazi kwa wakati kulingana na mkataba’’,amesema Sekambo.

Hata hivyo amesema Mpaka Mkataba unavunjwa Mkandarasi alikuwa amelipwa jumla ya Tshs 4,352,975,711.70 kati ya fedha hizo  malipo halisi  ya Mkandarasi yalikuwa Tshs 2,204,887,742.04 na  malipo ya awali (advance payment) yalikuwa Tshs 2,148,087,969.66 .

Amesema kati ya fedha hizo za malipo ya awali, Mkandarasi alikuwa anadaiwa Tshs 1,597,006,612.99, fedha hizo zote zimerudishwa na Bank of Africa tarehe 14/12/2018. Hadi mkataba unavunjwa kazi ilikuwa zimefikia hatua mbalimbali. 

Kulingana na Sekambo,ujenzi wa barabara mara ya pili, ulianza Machi 25,2018 baada ya kazi kutangazwa upya na kumpata Mkandarasi CHINA SICHUAN INTERNATIONAL CORPORATION (SIETCO) ambaye alitarajiwa kukamilisha mradi Septemba 30,2019 ambapo Mhandisi  Mshauri wa mradi huu ni  HOWARD HUMHFREYS (T) LTD.  

“Ujenzi huu unahusisha  barabara za  FFU –Matogoro    -   KM.3.2,Songea girls – Mateka  KM 1.5,Bombambili  – Mwembechai   KM 2.5,Majengo Mitumbani – Yapenda Annex.   KM 1.0,Stendi ya Mlilayoyo -  Polisi Station.  KM 0.4,Matomondo   - planet bar. KM. 0.8 na  Buhemba Annex  - Kalembo   KM 0.9’’,amesema.

Kazi zinazofanyika katika  ujenzi wa barabara ni,Kujenga barabara katika kiwango cha lami nzito zenye urefu wa KM 10.3 na upana wa Mita 8,Kujenga mifereji,Kujenga njia za watembea kwa miguu, Kuweka taa za barabarani,Kujenga Maabara kwa ajili ya kupima sampuli za udongo, Zege na baadhi ya sampuli za lami,(Material Test)

 Mradi  huu mpaka kukamilika utagharimu jumla ya Tshs 13,164,965,966 na  gharama ya Mhandisi mshauri  ni Tshs    337,000,000.

Mpaka sasa mradi kwa ujumla umefikia asilimia 90 ya utekelezaji . Mradi huu baada ya kukamilika kwa asilimia 100 utapandisha hadhi ya Manispaa  na  utarahisisha  usafiri na usafirishaji wa mazao, bidhaa na abiria  kutoka katika maeneo mbalimbali ya Halmashauri  hivyo kuongeza kasi ya ukuaji wa uchumi wa Manispaa na Wakazi wake.  Pia barabara hizi zitasaidia kupunguza msongamano wa magari na pikipiki katikati ya Manispaa hivyo kupunguza muda wa kuwa barabarani.

Mradi huu unaongeza thamani ya Ardhi  na nyumba zilizopo pembeni mwa barabara.Barabara zinazojengwa zitawekewa taa za barabarani ambazo zitasaidia katika ulinzi na usalama wakati wa usiku hivyo kupunguza matukio ya uhalifu kwa Raia na mali zao. Pia taa zitawasaidia wafanyabiashara wadogo kuongeza muda wa kukufanya  biashara zao wakati wa usiku na hivyo kuongeza  kipato na mzunguko wa fedha ndani ya  Manispaa. 

 Imeandikwa na Albano Midelo

Afisa Habari Manispaa ya Songea

Septemba 30,2019