MSTAHIKI MEYA MANISPAA YA SONGEA AMEWATAKA WAHESHIMIWA MADIWANI KUHAMASISHA WANANCHI KUSHIRIKI SENSA.

Tarehe ya kuwekwa: August 26th, 2022

Mstahiki Meya Manispaa ya Songea  Michael Mbano amewataka Waheshimiwa Madiwani  na Wataalamu wote kuendelea  kufanya uhamasishaji katika kata zao na kuendelea kuwahimiza wananchi  kujitokeza kuhesabiwa Sensa ya watu na makazi ambayo leo hii ni siku ya nne toka zoezi hilo lianze kufanyika.  

Rai hiyo imetolewa leo tarehe 26 Agosti 2022 katika Mkutano wa Baraza la Madiwani  uliofanyika katika ukumbi wa Manispaa ya Songea na kuhudhuriwa na Madiwani, Wananchi mbalimbali, Wataalamu na viongozi wa vyama vya siasa ambacho ni kikao cha kuhitimisha taarifa  kwa mwaka wa  fedha 2021 hadi 2022.

Mbano akihitimisha baraza hilo huku akitoa taarifa za kuwakaribisha wananchi wote katika  Mkutano wa Mwaka  wa Baraza la Madiwani ambao unatarajia kufanyika hapo kesho  tarehe 27 Agosti 2022 katika ukumbi wa Halmashauri ya Manispaa ya Songea.

Akihutubia Mkutano wa Baraza la Madiwani Waziri wa Katiba na Sheria DKT. Damas Ndumbaro(MB) alisema “ Bunge la Jamhuri ya Muungano wa Tanzania limepitisha Tozo na Kodi  ambayo hulipwa  na wananchi kwa ajili ya Maendeleo ya Taifa letu na hatimaye  hurudishwa asilimia kwenye Halmashauri mbalimbali ambazo husaidia jamii kwa maendeleo ya Nchi yetu”  Alisisitiza.

Alisema Kodi  inasaidia Serikali  kupata Maendeleo ambapo kwa Manispaa ya Songea imesaidia kujenga miradi mbalimbali  ya maendeleo ambapo  katika kipindi cha mwaka 2021/2022 Manispaa ya Songea  imewezesha kujenga vituo vya afya vitano 5, ujenzi wa Hospitali ya Manispaa ya ambayo inajengwa katika kata ya Tanga, Ujenzi wa Masoko mawili ya kisasa ya Manzese, pamoja na ujenzi wa Hospitali ya Rufaa Mkoa wa Ruvuma.

Dkt. Ndumbaro (MB) amebainisha kuwa ataendelea kutatua changamoto  zinazowakabili wananchi wa Jimbo la Songea Mjini  kwa lengo la  kusimamia na kutekeleza ilani ya Chama Cha Mapinduzi.

Naye Mwenyekiti wa Chama cha Mapinduzi Hamisi Abdallah Ally amewataka wataalamu kusimamia vizuri zoezi la usajili wa wakulima wanaohitaji pembejeo na kuondoa malalamiko mbalimbali ambayo yanaweza kujitokeza.

Mhe. Hamisi amesema Maafisa kilimo  wanatakiwa  kufanya kazi kwa weredi na kuhakikisha wananchi wanapata pembejeo ya Ruzuku kwa wakati na kwakuwa wamepewa vyombo vya usafiri watatakiwa kuwafikia wakulima kwa wakati na kutatua changamoto zao.

Waheshimiwa Madiwani kwa umoja wao wamepokea maagizo yaliyotolewa kwenye kikao hicho na wameahidi kutoa ushirkiano  kwenye kata zao.

Imeandaliwa na;

AMINA PILLY

AFISA HABARI MANISPAA YA SONGEA.