NAIBU MEYA MANISPAA ASISITIZA UWAJIBIKAJI WA VIONGOZI KWA JAMII.

Tarehe ya kuwekwa: February 16th, 2021

Ushirikishwaji na uwajibikaji wa viongozi kwa  wananchi ni  sehemu ya utawala bora kwa kiongozi, hivyo kila Mheshimiwa diwani katika Kata yake anatakiwa kuwashirikisha wadau wa maendeleo waliopo kwenye kata husika kwa ajili ya kusaidia kutatua changamoto mbalimbali zinazoikabili jamii.

Hayo yametamkwa na Naibu Meya Jeremia Milembe kwa niaba ya Mstahiki Meya wa Manispaa ya Songea Michael Mbano   katika  kikao  kazi ambacho kilihudhuriwa na  Maafisa watendaji wa kata, Waheshimiwa Madiwani, pamoja na Wakuu wa Idara kilichofanyika katika ukumbi wa Manispaa ya Songea leo 16 februari 2021.

Jeremia alisema katika kikao kijacho atahitaji  uwepo wa  taarifa kutoka kila kata  zikionesha aina ya changamoto na jinsi alivyoweza  kuitatua ili waweze kubaini njia ya kusaidia kuzitatua changamoto zinazowakabili wananchi wa kata husika.

Kikao hicho  hufanyika kabla ya kikao cha baraza la madiwani la Halmashauri ambacho hufanyika kwa  lengo la  kupokea taarifa mbalimbali za utekelezaji kutoka kila kata zinazojumuisha maendeleo ya elimu, miundombinu ya shule, Zahanati, maendeleo ya kilimo, mifugo, hali ya majanga, utawala, Uchumi, uimarishaji wa dhana ya uzalendo pamoja na kupokea changamoto mbalimbali kutoka kwenye kata na kufanyiwa ufumbuzi.

Jeremia amewataka wataalamu wa Manispaa kutoa ushirikiano kwa Madiwani ili kujenga ufanisi wa kiutendaji katika kutekeleza Ilani ya Chama Cha Mapinduzi (CCM) na kwa lengo la kutoa huduma bora kwa jamii ya Songea.

Naye  Afisa utumishi Mkuu Manispaa ya Songea Lewis Mnyambwa akitoa ufafanuzi kuhusu kikao cha utekelezaji ambapo  alisema  “ kanuni za kudumu za Halmashauri ya manispaa ya Songea Tangazo la Serikali Na 162 inasema taarifa za utekelezaji kutoka katika kata zitawasilishwa na Diwani wa kata husika au kama diwani hayupo, taarifa hiyo itawasilishwa na Diwani wa Viti maalum anayeishi katika Kata hiyo na kama Diwani Viti Maalum hayupo, Meya atamtaarifu mapema Diwani yeyote ili ajiandae kuwasilisha taarifa hiyo”.

Baraza hilo la Madiwani linatarajia kufanyika kesho 17.02.2021 katika ukumbi wa Manispaa ya Songea kuanzia muda wa  saa tatu asubuhi.

IMEANDALIWA NA;

AMINA PILLY;

AFISA HABARI MANISPAA YA SONGEA.

16 .02.2021