POLISI Ruvuma yakamata silaha ya kivita

Tarehe ya kuwekwa: July 19th, 2019

SILAHA moja ya kivita aina ya AK 47,risasi sita na  Meno mawili ya Tembo vimekamatwa katika kijiji cha Mangwamila kilichopo wilayani Songea kandokando ya mto Ruvuma mpakani mwa Tanzania na Msumbiji.

Kamanda wa Polisi Mkoa wa Ruvuma ACP Simon Marwa Maigwa akizungumza na waaandishi wa habari ofisini kwake mjini Songea, amemtaja mtuhumiwa aitwaye Fidel Mangala Said ambaye aliweza kumtaja mtuhumiwa  mwenzake aitwaye Maulid Japhary,miaka 45,mkazi wa kijiji cha Nambendo wilaya ya Songea  ambaye awali alifanya jaribio la kutoroka na  kukamatwa tarehe 15/7/2019.

Maigwa amesema meno hayo yenye thamani Zaidi ya milioni 34,  waliyahifadhi kwenye mfuko wa Sulphate na kuyafukia ardhini shambani kwa mtuhumiwa Issa Musa Milanzi, Mwenye umri wa miaka 46 mkazi wa Nambendo wilayani Songea wakiwa na mwenzake Fidelis Mangala,miaka 20 mkazi wa Nambendo.

“Watuhumiwa hao wamekiri kujihusisha kwa muda mrefu na uwindaji haramu na matukio mengine ya kihalifu ndani ya Tanzania na Nchi jirani ya Msumbiji”.amesema Maigwa.

Kamanda huyo wa polisi mkoani Ruvuma ametoa rai kwa wananchi kuendelea kutoa ushirikiano kwa jeshi la polisi ili kukomesha vitendo vya kiharifu na waharifu.    

Imeadaliwa na Farida Mussa

Kitengo cha TEHAMA  Manispaa ya Songea 

Julai 18,2019