RAIS Magufuli mgeni rasmi Tamasha la urithi wetu

Tarehe ya kuwekwa: September 1st, 2018

Rais wa Jamhuri wa Muungano wa Tanzania, Mhe. John Pombe Magufuli, anatarajiwa kuwa mgeni rasmi kwenye Tamasha la Mwezi wa Urithi linalotambulika kama Urithi Festival, "Celebrating Our Heritage" litakalozinduliwa rasmi  kitaifa katika uwanja wa Jamhuri jijini Dodoma Septemba 15, 2018

Akizungumza na waandishi wa habari  jijini Dodoma,  Naibu Waziri wa Maliasili na Utalii, Mhe. Japhet Hasunga amesema lengo la Tamasha  hilo ni kuenzi, kudumisha, kuburudisha na kujifunza masuala muhimu yanayohusu Urithi wa Mtanzania hususani tamaduni zetu, historia, malikale na maliasili.

Ameongeza kuwa Tamasha hilo litasaidia kukuza utalii wa ndani kwa kuongeza muda wa watalii wa kimataifa kukaa nchini kwa vile Tamasha hilo linafanyika katika kipindi ambacho watalii wengi wanatembelea Tanzania

 Aidha, Naibu Waziri huyo ametaja mikoa  sita pamoja na  tarehe zake  ambazo Tamasha hilo  litafanyika kitaifa, kwa kuanza na jiji la Dodoma tamasha hilo litaanza kufanyika kuanzia Septemba 15 hadi tarehe 22 na kwa Zanzibar litafanyika Septemba 23 hadi 29.Pia, kwa upande wa  Dar es Salaa na Mwanza tamasha hilo litafanyika Septemba 29 hadi Oktoba 6.

Aidha, kwa upande  wa Wilaya ya Karatu tamasha hilo litafanyika kuanzia Oktoba 8 hadi  12, wakati kwa Jiji la Arusha tamasha hilo linatarajiwa  kutafanyika Oktoba 8 hadi 13 mwaka huu.

Ameongeza kuwa Tamasha hilo litapambwa na shamrashamra za carnival ya mirindimo ya urithi, burudani za ngoma za asili, muziki na kwaya pamoja na sanaa za maonesho ya bidhaa ya wadau.Katika hatua nyingine, Naibu Waziri huyo amesema tamasha hilo la  urithi litanadiwa kwenye mitandao ya kijamii na vyombo vya habari kupitia themes za Mvalishe, Misosi ya Kwetu na Michongo ya Urithi.

Tamasha la Urithi Festival litakuwa linafanyika kila mwezi Septemba ya kila mwaka kuanzia mwaka huu.