SABABU za wamachinga Songea kuondolewa barabarani

Tarehe ya kuwekwa: August 17th, 2018

MSTAHIKI Meya wa Halmashauri ya Manispaa ya Songea Alhaji Abdul Hassan Mshaweji amezitaja sababu za wafanyabiashara wadogo maarufu kama wamachinga kuondolewa barabarani na kuwapeleka katika maeneo maalum yaliotengwa kwa ajili yao ni kuhakikisha wanafanya biashara katika maeneo salama na kuondoka barabarani ambako ni maeneo hatarishi.

" usalama wa wananchi ni kuhakikisha wanafanyakazi katika maeneo salama hivyo wamachinga tumewaandalia eneo la Majengo  ambako tunatengeneza barabara kwa kiwango  hiyo katika kiwango cha lami,tunatarajia hadi Novemba itakamilika,tunaweka  taa barabarani na miundombinu ya vyoo na maji hivyo watakuwa huru kufanya biashara zao  badala ya barabarani ambako ni hatari kwa usalama wao'',anasisitiza Mshaweji.

Amesema Manispaa ya Songea kwa kushirikiana na Jeshi la Polisi walifanya zoezi la kuwaondoa wamachinga katika maeneo ya barabarani na kwamba zoezi hilo ni endelevu  kwa kuwa Manispaa itaendelea kuwaondoa wamachinga watakaopanga bidhaa barabarani kwa usalama wao na ametoa rai kwa wafanyabiashara hao  watii sheria bila shuruti.

Uchunguzi umeonesha baadhi ya maeneo machache ambayo sio barabara kuu baadhi ya wamachinga wameonekana wanapanga biashara zao,hata hivyo idadi kubwa ya wamachinga wametii agizo la serikali kuondoka barabarani na kwenda katika maeneo rasmi ambayo wameandaliwa ba Manispaa ya Songea ili waweze kufanyabiashara zao kwa amani na utulivu.

Hata hivyo Mstahiki Meya amewasisitizia wafanyabiashara wachache ambao bado hawajaenda katika eneo la Majengo watoke barabarani na kwenda kuungana na wenzao kufanyabiashara na kwamba waache kisingizio kuwa katika eneo la Majengo halifai kwa biashara jambo ambalo sio sahihi kwa sababu wenzao wanafanyabiashara na kupata faida katika maeneo hayo.

Imetolewa na Albano Midelo

Afisa Habari Manispaa ya Songea

Julai 17,2018.