SERIKALI yatoa milioni 400 kujenga kituo cha Afya Ruvuma

Tarehe ya kuwekwa: August 14th, 2018

NAIBU Waziri Ofisi ya Rais, Tawala za Mikoa na Serikali za Mitaa (TAMISEMI) Josephat Kandege amekagua mradi wa kituo cha Afya kata ya Ruvuma katika Halmashauri ya Manispaa ya Songea.

Kandege ameagiza ramani ya kituo hicho kufanyiwa marekebisho kwa kutumia ramani mpya iliyotolewa na TAMISEMI  na kwamba kwa kuwa mradi upo katika hatua za awali ni rahisi kufanya marekebisho hayo.

Amesema katika ramani mpya Halmashauri inaweza kupanga bei kwa kila hatua na kwamba kwa ramani hiyo unaweza kubadilisha fundi  na kuendeleana fundi mwingine iwapo mmeshindana.

Naibu Waziri huyo pia ameagiza kuhakikisha eneo la kituo cha afya lisipungue  hekari nane na kuhakikisha kuwa eneo la kituo cha afya Ruvuma lipimwe  na kuwa na hatimiliki yake.

Kwa upande wake Mkurugenzi wa Halmashauri ya Manispaa ya Songea Tina Sekambo akitoa taarifa ya mradi huo ambao unaanzia Agosti Mosi hadi Novemba 30,2018,amesema Manispaa imepokea kiasi cha shilingi milioni 400 kutoka serikali ya Jamhuri ya Muungano wa Tanzania kwa ajili ya ujenzi wa kituo cha Afya kata ya Ruvuma.

Amelitaja lengo la kujenga kituo hicho cha Afya katika kata ya Ruvuma kuwa ni kuboresha huduma bora za afya kwa wananchi wa kata hiyo wapatao 17,536.

Hata hivyo  amesema kituo hicho kikikamilika kinatarajia kutoa huduma kwa wananchi 45,923 waliopo katika kata nne za Subira,Mateka,Majengona Ruvuma.

“Kituo hiki kinatarajia kupunguza maradhi sugu yanayowasumbua wananchi wa kata ya Ruvuma yakiwemo malaria,kuhara,kifuakikuu,UKIMWI na magonjwa ya njia ya mkojo na vichomi’’,anasisitiza Sekambo.

Kwa mujibu wa Sekambo, kituo hicho kinatarajiwa kuwa na majengo ya wodi ya akinamama,jengo la upasuaji,maabara,jengo la mapokezi,kuchomeataka,shimo la kutupia kondo la nyuma na shimo la kuhifadhia majitaka.

Katika kuhakikisha kazi inafanyika kwa ufanisi mkubwa,Sekambo amesema,Halmashauri imefanya uteuzi wa kamati tatu ambazo ni manunuzi,mapokezi na ujenzi kulingana na mwongozowa TAMISEMI na kwamba kamati zimeundwa kwakushirikisha jamii husika na wataalam wa Halmashauri.

Kwa upande wake Mstahiki Meya wa Halmashauri ya Manispaa ya Songea Alhaji Abdul Hassan Mshaweji amemshukuru Rais Dkt.John Magufuli kwakuipatia Manispaa hiyo fedha za ujenzi wa kituo cha afya kata ya Ruvuma.

Imetolewana Albano Midelo

Afisa Habari wa Manispaa ya Songea

Simu 0784765917