Wakili. Muhoja, Azungumza na Watumishi wa Elimu na Utawala, Asisitiza Nidhamu na Uwajibikaji.

Tarehe ya kuwekwa: July 23rd, 2025

Na; Amina Pilly

Mkurugenzi wa Manispaa ya Songea, Wakili Muhoja, leo amekutana na watumishi wa sekta ya elimu ya msingi na sekondari pamoja na maafisa watendaji wa kata na mitaa katika kikao kilichofanyika katika ukumbi wa Shule ya Wasichana Songea.

Kikao hicho ni sehemu ya utaratibu wake wa kawaida wa kukutana na watumishi kila baada ya miezi mitatu kwa lengo la kusikiliza na kupokea changamoto mbalimbali zinazowakabili watumishi hao, kujenga mawasiliano ya moja kwa moja, kuimarisha uwazi na mshikamano katika utekelezaji wa majukumu ya kila siku.

Wakili Muhoja amewataka watumishi hao kuendelea kudumisha nidhamu, kuzingatia maadili ya utumishi wa umma, na kuwajibika ipasavyo.

Aidha, alisisitiza umuhimu wa kuheshimu haki na stahiki za watumishi ikiwemo likizo, mafao ya likizo, posho, na vitendea kazi.

Alisema  kila  mtumishi anawajibu wa  kuhakikisha anatimiza majukumu yake kwa uadilifu na kutoa huduma bora kwa wananchi,” alisema Muhoja huku akihimiza usimamizi madhubuti wa elimu na kuhakikisha wanafunzi wanafaulu kwa viwango vya kuridhisha.

Kikao hicho kilijumuisha majadiliano ya wazi kati ya uongozi na watumishi, ambapo baadhi ya changamoto na mapendekezo yaliwasilishwa kwa ajili ya kuboreshwa kwa mazingira ya kazi na utoaji wa huduma kwa wananchi wa Manispaa ya Songea.