WAKUU WA SHULE SIMAMIENI WAZABUNI, WAHAKIKISHE WANAPELEKA CHAKULA CHENYE VIRUTUBISHO SHULENI.

Tarehe ya kuwekwa: February 23rd, 2023

Mkurugenzi Manispaa ya Songea Dkt. Frederick Sagamiko amewataka wakuu wa shule  kusimamia Wazabuni waliopewa kazi ya  kupeleka chakula shuleni wahakikishe wanapeleka chakula  kilichoongezewa  viini lishe ili kuwajengea lishe bora wanafunzi.

Alisema Manispaa ya Songea inaendelea kusimamia na kutekeleza mkakati waliojiwekea wa  kuondoa utapiamlo kwa kusimamia Mpango endelevu wa uhamasishaji na uelimishaji kwa jamii ili kujenga mwamko wa kuchangia chakula cha Wanafunzi shuleni pamoja na kuweka katazo  kwa Wazabuni kupeleka chakula kisichooongezewa virutubisho.

 Dkt. Sagamiko ametamka kauli hiyo  akiwa katika kikao cha kamati ya Lishe kilichofanyika tarehe 22 Februari 2023 katika  ukumbi wa Manispaa ya Songea kilichohudhuriwa na wadau mbalimbali wa Lishe kwa lengo la kupitia taarifa ya  utekelezaji wa shughuli za Lishe za Halmashauri na kufanya ufuatiliaji wa maazimio yahusuyo shughuli za lishe.

Kwa upande wake Afisa Lishe Manispaa ya Songea Albert Sinkamba alisema katika kipindi cha Oktoba hadi Disemba 2022, katika kupambana na udumavu na Utapiamlo, kitengo cha kilifanya  uchunguzi wa hali ya Lishe kwa kutumia mzingo wa mkoo  kwa watoto wenye umri chini ya miaka mitano  pamoja na kupima uzito  kulingana na umri wa mtoto ambapo jumla ya watoto 49,448 walichunguzwa hali ya lishe kati ya 37,818 sawa na asilimia 153.4%.

Sinkamba alisema kati yao 15 waligundulika kuwa na utapiamlo mkali sawa na asilimia 0.2 hata hivyo  watoto 692 sawa na asilimia 1.3% walichunguzwa na waligundulika kuwa na utapiamlo wa kadiri, pia watoto 48,741 waliochunguzwa sawa na asilimia 98.5% hawakuwa na utapiamlo.

Alibainisha kuwa miongoni mwa mikakati iliyowekwa katika kutekeleza afua za lishe ni pamoja na kuanzisha kituo cha kukusanyia maziwa ya ng’ombe, kuendelea kutoa elimu ya uandaaji wa chakula cha lishe, pamoja na uanzishaji wa klabu za lishe shuleni.

IMEANDALIWA NA;

AMINA  PILLY;

KITENGO CHA MAWASILIANO SERIKALINI.