WALIMU WAPATA MAFUNZO YA KUPAMBANA NA COVID-19 MANISPAA YA SONGEA.

Tarehe ya kuwekwa: June 23rd, 2020

Mkurugenzi Manispaa ya Songea Tina Sekambo akiwakilishwa na Afisa Elimu Msingi Manispaa ya Songea bi Zakia Fandey, amewaasa  walimu wote Manispaa ya Songea kufuata maelekezo yote yaliyotolewa na Serikali katika kupambana dhidi ya ugonjwa hatari wa CORONA katika maeneo ya kazi ili kudhibiti Maabukizi mapya ya Virus vya ugonjwa huo kwa Wanafunzi /Walimu wakiwa shuleni.

Bi Zakia ametamka hayo  katika mafunzo ya kupambana dhidi ya ugonjwa hatari wa  COVID-19,  yaliyoshirikisha  Maafisa  Elimu Kata,  Wakuu wa shule sekondari, pamoja na Walimu wa kuu shule za Msingi yaliyofanyika kwa nyakati tofauti katika Ukumbi wa Manispaa ya Songea tarehe 22/06/2020.

Aidha, aliongeza kuwa” Katika kuendeleza jitihada za kudhibiti maambukizi mapya ya virusi vya Corona (COVID-19) Manispaa ya Songea  imeandaa mkakati  ambayo inalenga  kuweka mazingira wezeshi ya udhibiti wa maambukizi ya COVID-19  katika Shule za Sekondari na Shule za Msingi. Pia alisema   mambo yafuatayo yanapaswa kuzingatiwa ikiwa  ni pamoja na  kutakasa  (Decontamination) mazingira yote ya shule, kutoa elimu kwa wanafunzi/ na walimu wote kuhusu ugonjwa wa COVID-19 pamoja na dalili zake na hatua za kuchukua ili kujikinga na maambukizi ya ugonjwa huo, Kuhakikisha uwepo wa vifaa vya kunawia mikono (sabuni na maji tiririka) kwa ajili ya usafi wa mikono katika kila eneo au maeneo ya madarasa, ofisi, kila geti/lango kuu, mabweni, maktaba, bwalo la chakula, vyoo na maeneo mengine muhimu, Pamoja na uwepo wa  vifaa vya kunawa mikono vizingatie mahitaji ya eneo husika. Alisisitiza.”

Naye Afisa afya Manispaa ya Songea  Maxensius Mahundi  alisema Lengo la kutoa mafunzo haya ni kuwajengea uwezo katika kupambana na COVD-19 ambayo yatawasaidia kufahamu namna maambukizi yanavyoweza kutokea, dalili na jinsi ya kuchukua tahadhari.

Mahundi alisema Elimu iendelee kutolewa mara kwa mara kwa kupitia vikao vya  kamati za Shule, Wananchi/Wazazi ili waweze  kuhamasisha wanafunzi  kuvaa barakoa wakati wanapokwenda au warudipo shuleni. Aliongeza kuwa   wazazi/walezi wahimizwe kuwapatia watoto wao barakoa za vitambaa kabla ya kwenda shuleni.

IMEANDALIWA NA;

AMINA PILLY 

KAIMU AFISA HABARI –MANISPAA YA SONGEA.