WANANCHI Songea waaswa kupisha ujenzi barabara za Sovi na Majengo

Tarehe ya kuwekwa: May 24th, 2019

MKURUGENZI wa Manispaa ya Songea Tina Sekambo anatoa rai kwa wajasirimali wanaofanya biashara ndogo ndogo katika barabara ya Sovi hadi Planet Bar kuondoa bidhaa zao na vizuizi vingine ili kupisha utengenezaji wa barabara hiyo unaofanywa  na  Kampuni ya SIETICO inayojenga barabara za lami katika Mji wa Songea.

Kwa mujibu wa Sekambo,wajasirimali  wadogo wengine ambao wanatakiwa kuondoka ni wale wanaofanya biashara zao Kata ya Majengo katika barabara inayotoka katika  SACCOS ya Manispaa ya Songea kupitia shule ya Msingi Songea ambapo Kampuni ya SIETICO inatarajia kujenga mitaro ambayo inapita katika maeneo hayo na kuishia bonde la  Matomondo.

Ujenzi wa barabara kiwango cha lami km 8.6 katika barabara za katikati ya Mji ulianza kutekelezwa tarehe 01 Juni, 2015 na ulitarajia kukamilika tarehe 30 Juni, 2017 chini ya Mkandarasi M/s Lukolo Co Ltd.

Gharama ya mradi ilikuwa ni Tshs. 14,320,586,464.39 (pamoja na VAT). Mpaka kufikia tarehe 30 Juni, 2017 mkandarasi alilipwa kiasi cha Tshs. 2,204,887,742.00 mkandarasi alishindwa kukamilisha mradi kwa mujibu wa mkataba, hivyo Halmashauri ilisitisha mkataba wa Matengenezo ya Barabara.

kazi ya Ujenzi wa barabara km 10.3 kwa kiwango cha lami ilitangazwa tena mwezi Oktoba 2017 na kupatikana kwa mkandarasi M/S CHINA SICHUAN INTERNATIONAL CO-OPERATION CO. LTD.

Mradi huu umeanza kutekelezwa mwezi Machi, 2018 na unatarajiwa  kukamilika  Septemba, 2019. Mpaka sasa Mkandarasi ameshalipwa kiasi cha Tshs. 6,038,006,039.65 ikiwa ni malipo ya awali pamoja na kazi ambazo ameshafanya mpaka sasa hivi.

Hadi sasa Mradi huu umefikia asilimia 50 ya utekelezaji. Mradi huu baada ya kukamilika utagharimu kiasi cha Tshs. 13,104,078,000.20 ikiwa ni gharama alizolipwa mkandarasi wa awali pamoja na mkataba mpya unaoendelea.

Kukamilika kwa mradi huu kutarahisisha mawasiliano na  kuongeza fursa za ajira, kiuchumi na usafirishaji wa bidhaa na mazao.

Imeandikwa na Albano Midelo

Afisa Habari Manispaa ya Songea 

Mei 23,2019