WATENDAJI Songea wasainishwa Mkataba wa Lishe

Tarehe ya kuwekwa: August 22nd, 2019

WATENDAJI wa kata na Mitaa wa Halmashauri ya Manispaa ya Songea mkoani Ruvuma wamesainishwa mkataba wa afua za lishe Mkoani Ruvuma

Afisa Lishe wa Manispaa ya Songea Anna Nombo akizungumza katika mkutano huo na watendaji wa kata amewataka kuwajibika katika kutekeleza malengo yote yaliyoko katika mkataba huo ili kuweza  kupunguza utapiamlo kwa watoto chini ya miaka mitano, wanawake wajawazito na akina mama wanaonyonyesha kwa kuwa  hali ya utapiamlo katika Mkoa ni kubwa zaidi.

Nombo, amesema kuwa utafiti wa afaya na Demogarfia ya mwaka 2015 na 2016 unaonesha kuwa udumavu umefikia asilimia  44 ambao unasabababishwa na mambo mbalimbali kama vile ulishaji duni,maradhi ya mara kwa mara na huduma hafifu za malezi na makuzi ya awali kwa watoto wadogo.

“Hivyo ili kufanikisha haya yote kunahitajika usimamizi wa hali ya juu kujenga taifa bora,Ni vyema tukashirikiana ili kutetea na kulinda maisha ya ndugu zetu.” Amesema Nombo.

Kwa upande wake, Mwenyekiti wa Maafisa Watendaji wa Kata na Mitaa ya Manispaa ya Songea ambaye ni Mtendaji wa Kata ya Ndilimalitembo  Bakari Kawina amewasisitiza watendaji wote kushirkiana kwa pamoja ili kufanikisha dhamira kuu iliyoko ndani ya mkataba huo na amewahasa kwa yeyote atakayekiuka atachukuliwa hatua za kisheria..

Pia amewaomba wananchi kutoa ushirikiano kwa viongozi kwa kuwa yote yaliyoainishwa katika mkataba yanawalenga wao na taifa kwa ujumla.

Mkataba huu utakuwa wa muda wa miaka mitatu na utaanza tarehe 01 julai, 2019 hadi tarehe 30 juni, 2021 ambapo Mkataba huu utapimwa kila baada ya miezi 6 ya utekelezaji.

Imeandaliwa na 

Bacilius Kumburu

Wa kitengo cha TEHAMA Manispaa ya Songea

22 August, 2019