800 wapata mimba za utotoni Tunduru

Tarehe ya kuwekwa: April 16th, 2019

WATOTO zaidi ya 800 wenye umri kati ya miaka 13 hadi 17 wilayani Tunduru mkoani Ruvuma wamepewa mimba za utotoni katika kipindi cha mwaka 2017/2018.

Kwa mujibu wa uchunguzi uliofanywa na  Idhaa ya Kiswahili ya BBC wilayani Tunduru,ongezeko kubwa la mimba za utotoni katika wilaya hiyo zimechangiwa na mila na desturi potofu za wakazi wa wilaya hiyo zinazochangiwa na wazazi na walezi.

Ripoti ya kati ya mwaka 2010 hadi 2017 ya  Shirika la Umoja wa Mataifa la  UNICEF linaloshughulikia watoto,inaonesha kuwa Tanzania ni nchi ya tatu kwa viwango vya juu vya mimba za utotoni baada ya nchi za  Uganda na Sudan Kusini.

Kulingana na takwimu hizo za UNICEF,kiwango cha watoto wenye umri chini ya miaka 18,wanaopata mimba za utotoni Sudan Kusini ni asilimia 52,Uganda asilimia 40,Tanzania asilimia 31 na Kenya asilimia 23.