DC Songea ameitaka Jamii kupinga Ukatili wa Kijinsia

Tarehe ya kuwekwa: March 2nd, 2023

Mkuu wa Wilaya ya Songea Kapenjama Ndile  ameiasa jamii  kuwa na uwajibikaji  na malezi bora ya watoto  wao ili kupunguza au kuondoa ongezeko  la watoto  wa mtaani.

Alisema ili kuondoa matabaka na unyanyasaji wa kijinsia kwa jamii ni lazima kupambana kuondoa unyonge, na fikra   potofu  ili kuwa na Usawa na Haki.

Hayo yameinishwa katika uzinduzi wa maadhimisho ya siku ya Wanawake Duniani kuelekea siku ya kilele cha Maadhimisho ya siku ya Wanawake Duniani ambayo huadhimishwa kila mwaka  ifikapo tarehe 08 Machi Duniani kote kwa lengo  la kukumbushana juu ya haki, usawa  kwa jamii hususani wanawake  kushiriki   katika kuchangia maendeleo,  yaliyofanyika katika uwanja wa Majimaji tarehe  01 Machi 2023.

Ndile  alisema lengo ni kutambua nafasi na mchango mwanamke katika kuchangia maendeleo ya jamii ambapo  amewataka wanawake  kujitokeza  kwa wingi katika kushiriki  kujiunga vikundi vya wajasiliamali ili kuweza kupata mikopo inayotolewa  na Halmashauri ya asilimia 10%  ili iweze kuwainua  kiuchumi  na kuongeza pato la familia.

Naye Afisa Maendeleo ya Jamii Manispaa ya Songea  Martin Mtani amesema  mikopo ya asilimia 4% ya fedha za mapato ya ndani kwa ajili ya kuwezesha wanawake kiuchumi inaendelea kutolewa kila robo ya mwaka  kwa lengo la kujenga Tanzania ya viwanda.

Mtani aliongeza  kuwa katika kipindi cha julai  hadi Deisemba 2023 Manispaa ya Songea imetoa mikopo ya thamani ya Mil. 286,700,000 ambayo ni 10% ya mapato ya ndani iliyotolewa  kwa vikundi vya wanawake.

 Akibainisha baadhi ya changamoto ambazo zinawakabili wanawake  ni pamoja na familia kukosa malezi  bora kutokana na mvunjiko wa ndoa, mwamko duni wa wanawake katika kufanya shughuli za kiuchumi, pamoja ongezeko la watoto wanaoishi katika mazingira magumu

Ili kukabiliana na changamoto hizo Manispaa ya Songea inaendelea na utoaji wa elimu kwa jamii, wadau, kwa kupitia mikutano ya Serikali za mitaa, vikao mbalimbali, na vyombo vya Habari ili kuweka usawa katika jamii.

KAULI MBIU.

“UBUNIFU NA MABADILIKO YA TEKNOLOJIA CHACHU KATIKA KULETA USAWA WA KIJINSIA”

IMETOLEWA NA;

AMINA  PILLY;

KITENGO CHA MAWASILIANO SERIKALINI.