KIFAHAMU kikundi cha ufugaji ng'ombe cha Bariki Lilambo

Tarehe ya kuwekwa: June 10th, 2018

KIKUNDI cha Bariki ni miongoni mwa vikundi vinavyojishughulisha na ufugaji wa ng’ombe wa maziwa katika Manispaa ya Songea. Kikundi hiki kilichopo Kata ya Lilambo kilianzishwa mwaka 2013 kwa usajili namba CBO/00409 wa tarehe 21-08 –2013 Kikiwa na idadi ya wanachama 18 ambapo wanawake ni 17 na mwanaume ni mmoja.

Lengo la mradi ni kuboresha lishe, kutoa ajira kwa vijana, kuongeza kipato cha wanakikundi na hatimaye kuinua uchumi wa viwanda kwa kuanzisha kiwanda kidogo cha kusindika maziwa.

Taarifa za kikundi hicho inaonesha kuwa  kikundi hiki kilipatiwa mradi wa Ng’ombe wanane kutoka Halmashauri ya Manispaa ya Songea  Aprili 2017. Kwa sasa idadi ya Ng’ombe imeongezeka kutoka ng’ombe wanane hadi 12, hii  ni kutokana na kuzaliwa ndama wanne. Mradi huu mpaka sasa umegharimu zaidi ya shilingi milioni 12.

Uzalishaji wa maziwa ni wastani wa lita 13 mpaka 15 kwa siku kwa kila ng’ombe. Endapo ng’ombe wote watazaa, uzalishaji wa maziwa kwa miezi 10 kwa ng’ombe wote 8 zitapatikana lita 36,400 na kukipatia kikundi  Shilingi 30,940,000.00 kwa wastani wa bei shilingi 700 mpaka 1000. Fedha hizi zitatusaidia kusomesha watoto,kuchangia bima za afya na kujenga nyumba za kisasa.

Malengo ya baadaye ya kikundi ni kuanzisha kiwanda kidogo cha usindikaji maziwa kwa sababu ndani ya kata ya Lilambo kuna jumla ya ng’ombe 882 wa asili na wa kisasa wanaozalisha maziwa lita 77520 kwa mwaka.

 Ni matarajio  kwamba mradi huu utawakwamua wanakikundi na umaskini na kuwafikisha kwenye uchumi wa viwanda endapo soko la maziwa litaboreka

Imetolewa na Albano Midelo

Afisa Habari Manispaa ya Songea

Juni 10,2018.