MAAFISA elimu Kata mkoani Ruvuma wapewa Tablets za kukusanyia taarifa za shule

Tarehe ya kuwekwa: June 6th, 2018

MAFUNZO ya MFumo wa utoaji taarifa katika shule msingi(SIS) yaliyowashirikisha washiriki  zaidi ya  300 kutoka Halmashauri zote nane za mkoa wa Ruvuma yamefanyika kwa siku mbili kwenye ukumbi wa shule ya sekondari ya wasichana Songea(Songea Girls) mjini Songea.Mafunzo hayo ambayo yameandaliwa na Shirika la TUSOME PAMOJA kwa ufadhili wa USAID ya Marekani kwa kushirikiana na TAMISEMI yamewashirikisha maafisa elimu kata  zote,maafisa elimu,maafisa TEHAMA, maafisa takwimu,maafisa uchumi na wathibiti ubora  toka Halmashauri zote za mkoa wa Ruvuma.

Mafunzo hayo yamelenga kuwajenga uwezo wa kutumia mfumo wa ukusanyaji wa taarifa za shule za msingi kwa kutumia vishikwambi(Tablets). Mfumo wa SIS ni nyenzo ya usimamizi wa shule na kiini cha taarifa za shule na kwamba SIS inatoa taarifa kwa muhtasari na kwa kina kuhusu utendaji wa shule.

Takwimu ambazo zinapatikana kwenye mfumo wa  SIS  zinaweza kutumika kusaidia katika kufanya maamuzi na kutengeneza sera,kutoa taarifa kuhusiana na hali ya mfumo wa elimu nchini,kubainisha mahitaji ya kielimu na kusaidia Mamlaka kufanya maamuzi ya namna bora ya kugawanya rasilimali.

Mafunzo ya mfumo wa SIS ngazi ya Halmashauri zote katika Mkoa wa Ruvuma yanatarajiwa kushirikisha walimu wakuu wote na  kufanyika kwa siku mbili ambapo katika Halmashauri ya Manispaa ya Songea mafunzo hayo yatahusisha walimu wakuu 75.

Imeandaliwa na Albano Midelo

Afisa Habari Manispaa ya Songea

Juni 6,2018