Mafunzo ya uandaaji wa Mpango na Bajeti kutolewa kwa wakuu wa Idara Manispaa ya Songea.

Tarehe ya kuwekwa: November 18th, 2020

Mwongozo wa Mpango na Bajeti ni nyenzo ya kuandaa na kutekeleza Bajeti ya Serikali na taasisi zake pamoja na Mpango wa Maendeleo wa Taifa wa mwaka mmoja mmoja, ambao unatoa maelekezo mahsusi kwa maafisa masuuli juu ya ukusanyaji wa mapato na usimamizi mzuri wa matumizi ya fedha za umma ambao  unatoa ukomo wa Bajeti ya Serikali kwa kuzingatia maoteo ya vyanzo vyote vya mapato ya ndani na nje.

Hayo yametamkwa na Mchumi wa Manispaa ya Songea  Andambike B. Kyomo wakati wa kutoa mafunzo kwa Wakuu wa Idara na vitengo  kwa lengo la kuwajengea uelewa wataalamu hao namna ya  uandaaji wa mpango na bajeti wa Serikali kwa mwaka wa fedha 2020/2021 na 2021/2022  yanayoendeshwa na ofisi ya Mchumi wa Manispaa ambayo yataendelea kutolewa kwa muda wa siku tatu kuanzia  leo 18 hadi 20 novemba 2020,  katika ukumbi wa SACCOS ya Watumishi wa Manispaa ya Songea.

Kyomo alisema”  Mpango ni mchakato wa pamoja wa uandaaji taarifa wenye dira na  lengo linalokusudiwa katika kiwango Fulani na bajeti nimakadirio ya mapato na matumizi ya fedha, ili kuhakikisha mpango unafanikiwa kwa wakati uliotarajiwa.”

Madhumuni ya Mwongozo wa Mpango na Bajeti wa mwaka  ni pamoja na Kuhakikisha       ufanisi katika utayarishaji wa Mipango na Bajeti, Kuainisha vipaumbele vya Serikali vitakavyozingatiwa katika bajeti, pamoja na  Kutoa maelekezo mahususi ya Serikali kwa Maafisa Masuuli watakayopaswa kuyafuata kwenye Mipango na Bajeti za mafungu yao. Kyomo alibainisha.

Aliongeza kuwa kila mpango na Bajeti wa Serikali lazima uzingatie vipaumbele muhimu      vinavyogusa jamii ikiwemo  Kukuza Uchumi na Maendeleo ya Viwanda, Kusimamia na kuendeleza Mipango Miji na Makazi, Maendeleo ya Watu ambayo ni  hatua za kimkakati katika maendeleo ya watu zinazolenga kuboresha   mifumo ya  upatikanaji wa huduma za jamii kama elimu, Afya na Ustawi wa Jamii, Maji Safi na Salama, Majitaka, pamoja na uwezeshaji Wananchi Kiuchumi pamoja  na miundombinu.

Mwisho,  aliwaasa Wataalamu hao kusoma Ilani ya  Chama Cha Mapinduzi mara kwa mara ili wanapoandaa mpango na bajeti wa mwaka husika  lazima uendane na ilani ya Chama Cha  Mapinduzi kujua  nini  kimeelekeza. “Alisisitiza “

IMETAYARISHWA NA;                      

AMINA PILLY;

AFISA HABARI MANISPAA YA SONGEA.

18.11.2020