MAKAA ya mawe ya Ngaka kupelekwa India

Tarehe ya kuwekwa: October 20th, 2019

Mkuu wa Mkoa wa Ruvuma Christina Mndeme amesema kuanzia Novemba 2019 makaa ya mawe ya mgodi wa Ngaka wilayani Mbinga yataanza kusafirishwa na kuuzwa nchini India ambako yatatumika kuendeshea viwanda katika nchi hiyo.

Mgodi wa  madini ya Makaa ya mawe wa Ngaka uliopo katika kijiji cha Ntunduwaro kata ya Raunda wilayani Mbinga Mkoani Ruvuma,utafiti umebaini kuwa makaa hayo yanaongoza kwa ubora Duniani.

Kabla ya kuanza rasmi mgodi huo  utafiti ulifanyika mwaka 2008 ambapo kiasi cha zaidi ya tani 1000 zilichukuliwa na kusafirishwa kupelekewa nchini Afrika ya kusini kwa uchunguzi na kwamba uchimbaji rasmi ulianza mwaka 2011.

Matokeo yalionesha kuwa  madini ya makaa ya mawe ya mgodi wa Ngaka  ubora wake haufanani na makaa ya mawe unaochimbwa katika nchi yeyote duniani na kufanya makaa hayo kuwa adimu Duniani.

Mgodi wa madini ya Makaa ya mawe wa Ngaka, unamilikiwa kwa ubia kati ya Serikali ya Tanzania yenye asilimia 30, na kampuni ya Intra Energy ya Australia yenye Hisa  ya asilimia 70

Utafiti umebaini kuwa mgodi wa madini ya makaa ya mawe  Ngaka unakadiriwa kuwa na zaidi ya tani milioni 400 za makaa ya mawe,kiasi hicho, kwa mujibu wa wataalam, kinaweza kuchimbwa kwa kipindi cha zaidi ya miaka 100.

.