MANISPAA ya Songea yakusanya mapato kwa asilimia 81

Tarehe ya kuwekwa: August 6th, 2018

HALMASHAURI ya Manispaa ya Songea mkoani Ruvuma imefanikiwa kukusanya mapato kwa asilimia 81 katika kipindi cha mwaka wa fedha wa 2017/2018.Akizungumza kwenye mkutano wa kufunga mwaka wa Baraza la madiwani la manispaa hiyo  Kaimu Mkurugenzi wa Manispaa hiyo Alto Liwolelu amesema tofauti ya makusanyo ni asilimia 19 na kwamba kodi za viwanja ndizo ambazo zimekwamisha makusanyo hayo hali ambayo imesababisha Manispaa hiyo kushindwa kufikia malengo ya kukusanya kwa asilimia 100.

Hata hivyo amesema masoko hayo hayafanyi kazi ndiyo yamekwimisha manispaa hiyo kushindwa kufikia malengo na kwamba katika manispaa hiyo kuna masoko manne ambayo hayafanyikazi  na chanzo chanzo cha makusanyo katika viwanja yalikuwa na thamani ya zaidi ya shilingi milioni 400 ambapo katika kikao cha Kamati ya Fedha na Uongozi wamekubaliana kuhakikisha kuwa changamoto zilizopo katika masoko hayo zinatafutiwa ufumbuzi ili yaweze kuanza kufanyakazi na kwamba manispaa inatarajia kuwatambua wafanyabiashara wote kwa kuwapa vitambulisho ili wasikwepe kulipa ushuru.

Kwa upande wake Mstahiki Meya wa Manispaa ya Songea Alhaj Abdul Hassan Mshaweji ameyataja malengo ya Manispaa hiyo katika kipindi cha mwaka wa fedha wa 2018/2019 ni kuhakikisha kuwa mapato ya manispaa ya Songea  yanakusanywa kwa asilimia 100 na kuzuia mianya yote inayosababisha mapato kuvuja na kwamba Manispaa imejipanga kubuni vyanzo vipya vya mapato hali ambayo itawezesha manispaa hiyo kufikia malengo yaliyokusidiwa.

Imeandaliwa na Albano Midelo

Afisa Habari Manispaa ya Songea 

Agosti 6,2018