Milion 113 Zatolewa Mkopo kwa Vikundi 48 Manispaa ya Songea.

Tarehe ya kuwekwa: June 29th, 2021

Manispaa ya Songea imetoa kiasi cha Tshs 113, 760, 000/= kwa jumla ya  Vikundi vya wajasiliamali  48 vyenye wanachama 144 ikiwa vikundi vya wanawake 39, vikundi vya vijana 07 na vikundi vya watu wenye ulemavu 2.

Mikopo hiyo imetolewa ikiwa ni makusanyo ya fedha zitokanazo na mapato ya ndani ambapo wanawake asilimia 40%, vijana 40% na walemavu asilimia 20%, tukio hilo limefanyika leo tarehe 29 Juni 2021 katika ukumbi wa Manispaa ya Songea, kwa lengo la kuwainua wajasiliamali wadogo waliopo katika Manispaa ya Songea.

Mgeni rasmi katika zoezi hilo la utoaji wa mikopo kwa vikundi 48 alikuwa  Mheshimiwa Mbunge wa Jimbo la Songea Mjini Dkt. Damas Ndumbaro Waziri wa Utalii na Maliasili  ambaye aliwakilishwa na Naibu Meya Jeremia Mlembe ambapo aliipongeza Halmashauri ya Manispaa ya Songea kwa kuonyesha juhudi katika kutekelezaji wa sheria na kanuni za uchangiaji wa 10% ya mapato ya ndani pamoja na uhimizaji wa utoaji wa mikopo ambapo kiasi cha Tshs. 113,760,000/= zimetolewa.

Jeremiah alisema  Mkopo huu utumike kwa ajili ya miradi yenu kulingana na  maandiko ya miradi iliyoombwa ili  iweze kuleta  Mafanikio ya haraka kwa jamii sambamba  na kufanya marejesho mkopo  kila mwezi na kwa wakati ili kuwapatia fursa wahitaji wengine kukopeshwa na endapo hawatarejesha kwa wakati watachukuliwa hatua za kisheria. ’Alisisitiza’

Amewata  wajasiliamali  hao  kujitokeza kwenda kupima afya kwa hiari, kujilinda  na janga la UKIMWI pamoja na CORONA.’ Jeremia  alieleza’

Kwa upande wake Afisa maendeleo ya jamii Manispaa ya Songea Martin Mtani amesema  kabla ya kutoa mkopo huo timu ya wataalamu ilifanya ufuatiliaji na uhakiki kwa vikundi vyote vilivyoomba mikopo na baadhi ya miradi ya vikundi vilivyokidhi vigezo ni ufugaji wa kuku, nguruwe, ushonaji, ufumaji wa makapu na utengenezaji batiki.

Mtani aliongeza kuwa utoaji wa mikopo hiyo umewasaidia  wanufaika  wengi kuweza kuboresha makazi yao, kusomesha watoto na kutoa ajira kwa watu wengine.

Amesema kuwa kwa mwaka wa fedha 2021/2022 Halmashauri ya Manispaa ya Songea inatarajia kuboresha utaratibu wa utoaji wa mikopo mikubwa kwa vikundi vyenye miradi yenye tija ikiwa ni utekelezaji wa agizo la Mheshimiwa Rais  wa Jamhuri  ya Muungano wa Tanzania.’Alibainisha’

IMEANDALIWA NA,

AMINA PILLY,

AFISA HABARI MANISPAA,

29.06.2021.