MNARA wa Mashujaa 67 wa Songea alama ya Ukombozi

Tarehe ya kuwekwa: January 17th, 2018

MAKUMBUSHO ya Taifa chini ya Wizara ya Maliasili na Utalii imejenga mnara wa kumbukumbu ya mashujaa 67 walionyongwa kikatili katika eneo la Songea klabu uliogharimu zaidi ya sh. milioni 16.

Lengo la Mnara huo ni kuwaenzi mashujaa hao ambao wakati wa uhai wao waliendeleza mapambano dhidi ya wakoloni na kuhakikisha kuwa watanzania wanajitawala wenyewe badala ya kuendelea kukandamizwa na kunyonywa na wakoloni.

Mhifadhi Kiongozi wa Makumbusho ya Taifa Philipo Maligisu anasema kuwa ujenzi wa mnara ni sehemu muhimu ya kumbukumbu ya  mashujaa hao muhimu katika historia ya ukombozi wa nchi yetu.

Anasema mashujaa hao watakumbukwa milele kutokana na mchango wao katika ukombozi wa Tanganyika uliosababisha kumwaga damu.

Naye Mkurugenzi wa Makumbusho ya Taifa ya Majimaji Bartazar Nyamusya anasema ujenzi wa Mnara huo ni sehemu ya uboreshaji wa Makumbusho ya Taifa ya Majimaji  ya Songea ambayo sasa ina vivutio mbalimbali vya utalii wa kiutamaduni na kishujaa ambao unavutia watalii wengi wa ndani na nje ya nchi.