MRADI wa machinjio ya kisasa ya Songea wafikia asilimia 65

Tarehe ya kuwekwa: October 20th, 2018

MRADI wa machinjio ya kisasa katika Kata ya Tanga Manispaa ya Songea mkoani Ruvuma  umefikia Zaidi ya asilimia 65  ambapo hadi sasa Mkandarasi ameshalipwa Zaidi milioni 900 ambayo ni asilimia 35 ya malipo ya mradi huo ambao unagharimu Zaidi ya bilioni 3.2.

Mradi wa machinjio ya kisasa unafadhiliwa na Benki ya Dunia kwa gharama ya shilingi bilioni 3.2 Mkandarasi wa mradi huo ambaye ni Kampuni ya Giraffe hadi sasa amelipwa shilingi milioni 900  ambapo mkataba wake ni wa mwaka mmoja ambao umeanzia Julai Mosi 2017 na kukamilika Julai mosi, 2018.

Hata hivyo Mkandarasi huyo aliomba kuongezewa miezi mitatu ili kukamilisha kazi hiyo na kuzitaja sababu zilizochelewesha mradi huo kuwa ni marekebisho ya michoro,kuchelewa kukabidhiwa mradi na kuongezeka kazi za ziada ikiwemo uzio na barabara.Mkandarasi huyo amesema hivi sasa kinachoendelea ni ujenzi wa zizi,wigo na kazi ya ukamilishaji(finishing) ambayo anasema anatarajia kuikamilisha mwishoni mwa mwezi Novemba na kwamba Desemba mwaka huu anatarajia kukabidhi mradi huo kwa manispaa ya Songea.

Kwa mujibu wa Danda kazi ambazo zinafanyika kwenye mradi huo ni ujenzi wa machinjio yenye urefu wa meta 64 na upana wa meta 24,ujenzi wa zizi lenye uwezo wa kuhifadhia ng’ombe 200 na ujenzi wa uzio,tanki la kuhifadhia maji lenye ujazo wa lita ya 162,000.

Kazi nyingine anazitaja kuwa ujenzi wa nyumba mbili ikiwemo ya daktari wa mifugo na mlinzi,ujenzi wa barabara ya kilometa moja ambayo itazunguka eneo la mradi na ujenzi wa maeneo ya kupaki magari.

Wawakilishi toka Benki ya Dunia mwezi Machi mwaka huu walifanya ukaguzi katika mradi huo na kuridhishwa na viwango vya ujenzi wa mradi huo.

Imetolewa na Albano Midelo

Afisa Habari Manispaa ya Songea

Oktoba 19,2018