ST.Benjamin zahanati ya kisasa Songea iliyozinduliwa na Mwenge wa Uhuru

Tarehe ya kuwekwa: June 9th, 2018

UJENZI wa zahanati ya St. Benjamini iliyopo katika Kata ya Msamala Manispaa ya Songea mkoani Ruvuma,ulianza Novemba 2012 na kukamilika mwaka 2014. Ujenzi wa  Zahanati hii umegharimu shilingi 468,000,000.00 ambazo zimetumika kujenga na kukamilisha vyumba 16 na vyoo matundu manane.

 Zahanati  hiyo ilisajiliwa na kuanza kutoa huduma rasmi  Machi 2017. Zahanati hii inahudumia wakazi  kutoka sehemu mbalimbali ndani na nje ya Manispaa, ambapo Jumla ya wagonjwa 345 wanapata huduma katika zahanati hiyo  kwa mwezi kati yao watoto ni  75 na wakubwa ni 270.

Hata hivyo  lengo la kujenga zahanati hii ni; Kusogeza huduma kwa jamii,Kupunguza msongamano wa wagonjwa hospitali ya rufaa ya Mkoa (Homso),Kutoa huduma za mama na mtoto (RCH) na wale wenye bima za Afya endapo tutakubaliwa,Kutoa huduma za uchunguzi wa tiba kwa watoto yatima wanaotunzwa katika kituo cha St. Theresa na Kutoa huduma za vipimo mbalimbali za mama wajawazito.

Akizungumza mara baada ya kuzindua zahanati hiyo Kiongozi wa Mbio za Mwenge wa Uhuru mwaka 2018 Charles Kabeho ameagiza Mfuko wa Bima ya Afya(NIHF) kushughulikia haraka maombi ya kibali cha zahanati hiyo kutoa huduma kwa kutumia Bima ya Afya ili kuwawezesha wananchi wanaokatwa fedha zao Bima kutumia zahanati hiyo kupata huduma hivyo kupunguza msongamano katika hospitali za wilaya na Rufaa mkoani Ruvuma.

Imetolewa na Albano Midelo

Afisa Habari Manispaa ya Songea 

Juni 9,2018