TAKUKURU Ruvuma yawafikisha mahakamani wawili kwa tuhuma za rushwa

Tarehe ya kuwekwa: September 14th, 2019

TAASISI ya kupambana na kuzuia rushwa TAKUKURU Mkoani Ruvuma imewafikisha mahakamani watuhumiwa wawili kwa kosa la kupokea rushwa wilayani Namtumbo.

Naibu Mkuu wa takukuru Mkoa wa Ruvuma Owen Jasson ameeleza kuwa watuhumiwa  Yasini Habibu Pili Mpeni ambaye ni Mwenyekiti wa Baraza la Ardhi Kata ya Lisimonji na Rashid Ngereka ambaye ni Mjumbe Baraza la Ardhi Kata ya Lisimonji  wamefikishwa katika Mahakama ya Namtumbo wakikabiliwa na makosa ya rushwa kinyume na kifungu cha 15 cha sheria Namba 11/2007.

Jasson amesema mnamo tarehe 11/9/2019 ofisi ya TAKUKURU wilayani Namtumbo ilipokea taarifa ya malalamiko dhidi ya Watendaji wa Baraza la Ardhi na Usuluhishi wa migogoro kata ya Lisimonji na wajumbe wake kwa kuomba rushwa ya Tshs.150,000/= kwa ndugu Ditram Nyoni ili watoe maamuzi yenye kumpendelea  kwenye shauri la mashamba dhidi ya ndugu Milkon Nchimbi .

“Baada ya kupokea taarifa hiyo uchunguzi ulifanyika na mtego wa hongo ukaandaliwa ambapo watuhumiwa hao wawili walikamatwa wakipokea fedha hizo za rushwa”Amesema Jasson.

Watuhumiwa tajwa hapo juu walifikishwa kwenye Mahakama ya Wilaya ya Namtumbo mnamo tarehe 12/09/2019 na kusomewa mashtaka yao.

Imeandaliwa na 

Jamila Ismail 

Wa kitengo cha TEHAMA Manispaa ya Songea 

 Agosti 13, 2019.