WAFANYABIASHARA waaswa kulipia leseni za biashara

Tarehe ya kuwekwa: August 23rd, 2019

AFISA Biashara wa Halmashauri ya Manispaa Songea mkoani Ruvuma Furaha Mwangakala amewataka wafanyabiashara kukata na kulipia leseni kwa wakati ili kuepuka usumbufu wa kufungiwa biashara  zao.

Mwangakala akizungumza ofisini kwake mjini Songea, ameeleza umuhimu wa kuwa na leseni ya biashara na kulipia kwa wakati na kwamba ni dhamana kwa mfanyabiashara,pia inatambulisha biashara yake, Serikali inamtambua  na  inamrasimisha mfanyabiashra na kazi yake.

Amesema  kuwa ni muhimu kwa wafanyabishara kukata leseni kwa wakati ili kuepuka adhabu mbalimbali zinazoweza kusababisha kufungiwa biashara zao na kutokuwa huru katika utendaji wa kuuza na kutoa huduma ambapo kwa mfanyabiashara asiye na kibali na asiye lipia adhabu ya kisheria ni kati ya shilingi 200,000 na isiyozidi shilingi 1,000,000 .

“kwa mfanyabiashara leseni ni kama dhamana na anatakiwa kulipia leseni  siku 21 mara baada ya kuisha.”amesisitiza Mwangakala

Hata hivyo amezitaja changamoto ambazo wanakumbana nazo ni pamoja na uelewa mdogo  kwa wafanyabiashara na kusababisha  wengi wao kutokuwa na leseni ambapo kwa mwaka 2018 wafanyabiashara wenye leseni walikuwa asilimia 96 na mwaka 2019 ni asilimia 94 hivyo kuna upungufu wa asilimia 2 kwa mwaka 2019.

Mwangakala amesema mwaka 2019 wafanyabiashara 96 wamefunga biashara zao kutokana na kufirisika hivyo kusababisha kupungua kwa walipaji kodi kwa asilimia mbili pia ameiomba serikali kuboresha gharama za kodi ili ziwe rafiki kwa wafanyabiashara.

 Amezitaja namna mbili za kutoa leseni ambazo ni  kwa bidhaa au huduma ambazo  hudumu  kwa mwaka na leseni za vilevi ambazo  hudumu  kwa mienzi sita.

Imeandaliwa na

Myovela Jamila

Wa kitengo cha TEHAMA Manispaa ya Songea

Agosti 23, 2019