WALIMU Songea washauri kuzingatia alama za usalama barabarani

Tarehe ya kuwekwa: August 26th, 2019

WALIMU wa shule za Msingi katika Halmashauri ya Manispaa ya Songea mkoani Ruvuma wameshauri  wananchi kutambua umuhimu wa alama za barabarani ili kupunguza ajali.

Akizungumza wakati anawavusha wanafunzi wa shule ya msingi Songea,Mwalimu wa shule hiyo  Pita Naneka  amesema kuwa alama za vivuko vya waenda  kwa miguu vimesaidia kupunguza ajali za barabani na kuepusha serikali  kupata hasara  zinazotokana na majeruhi na vifo vinavyotokana na ajali.

Mwalimu Naneka ameiomba Serikali ishirikiane na Polisi wa usalama barabarani  kutoa elimu kwa wanajamii ili kutambua umuhimu wa alama za barabani, pia ametoa wito kwa madereva  kufuata alama hizo ambazo zimewekwa katika maandishi angavu na sheria kali zichukuliwe kwa madereva wasiofuata sheria za usalama barabarani.

“Wavuka wa miguu wanatakiwa kutambua alama ya pundamilia ni sehemu maalum ya kivuko cha waenda kwa miguu.”Amesisitiza Naneka.

Kwa upande wake Mwalimu Leonard Nkoma anayefundisha katika shule ya Msingi Songea amekiri kuwa alama hizo  zimewasaidia wanafunzi  kuwa salama kwa kuwa wanafunzi wanakuwa  huru  wanapovuka barabara na kufika shuleni kwa wakati .

Alama za barabarani ni vyema zikafuatwa ili kupunguza ajali za barabarini na kunusuru maisha ya watu na mali zao.

Imeandaliwa na 

Severine Fussi

Wa kitengo cha TEHAMA Manispaa ya Songea

Agosti 26, 2019