WANAWAKE 30 wanafariki kila siku kutokana na matatizo ya uzazi

Tarehe ya kuwekwa: August 17th, 2019

Mkuu wa wilaya ya Songea Mkoani Ruvuma Pololet Mgema  amezindua kampeni ya jiongeze tuwavushe salama katika kata ya Ruvuma manispaa ya Songea.

Akizungumza katika uzinduzi huo  Mgema amesema kuwa kampeni ya jiongeze tuwavushe salama ina lengo la kuongeza kasi ya uwajibikaji,kupunguza vifo vya wajawazito  na watoto wachanga katika Manispaa ya Songea.

Mgema amesema takwimu ya vifo kwa mwaka 2015/2016   inaonesha kuwa viwango vitokanavyo na uzazi ni 556 kwa kila vizazi hai 100,000 ambayo ni sawa na wanawake 30 ambao hufariki kila siku nchini kutokana na matatizo ya uzazu..

Takwimu za Manispaa ya Songea kwa mwaka 2018  zinaonesha kuwa kulikuwa na vifo 22 vilivyotokea sawa na 188 kwa kila vizazi hai 100,000.  Kutokana na vifo hivyo  Mkuu huyo wa Wilaya amewaomba wananchi kuongeza nguvu kwa kutekeleza na kusimamia ili kuokoa maisha ya wananchi.

“Maneno basi, hapa ni vitendo tu, hapa ni kazi tu, Mama akivuka salama na nchi imevuka salama.’’,alisisitiza Mgema.

 Naye,Mganga Mkuu wa Halmashauri ya Manispaa ya Songea Dkt. Mameritha  Basike ameyata malengo ya kuzindua kampeni hiyo ya jiongeze tuwavushe salama kuwa ni kutaka kupunguza vifo vya wajawazito, wazazi na watoto wachanga nchini Tanzania.

Mganga huyo amesema madhumuni ya kampeni hii ni kuhamasisha viongozi wa ngazi zote,serikali,viongozi wa Dini,Mashirika yasiyo ya kiserikali,wadau wa maendeleo,Watoa Huduma za Afya,Familia na Jamii kwa ujumla.

Kwa mujibu wa Basike, sababu zinazosababisha vifo kwa wazazi na watoto wachanga, ni kutokwa na damu nyingi baada ya kujifungua ambapo  asilimia 18 ya vifo intokana na kifafa cha mimba  na  asilimia tano,kutoka damu kabla ya kujifungua na ,kushindwa kupumua ni  asilimia 25.2.

Hata hivyo amezitaja changamoto wanazokabiliana nazo kuwa uwelewa  mdogo kwa jamii kuhusu masuala ya Afya ya Uzazi kwa Mtoto,akina mama wanachelewa kuanza kliniki mapema na  uhaba wa magari ya kubebea wagonjwa.

Dkt.Basike ameitaja mikakati madhubuti ambayo wameweka kwa ajili ya kupunguza vifo vya mama na mtoto, kuwa ni  kuimarisha huduma za uzazi wa mpango zikiwemo huduma za ushauri kwa wanawake mara baada ya kujifungua,utoaji wa Elimu ya Afya ya uzazi kwa jamii  na ushirikishwaji wa wanaume katika huduma za uzazi.

Halmashauri ya Manispaa ya Songea ina jumla ya vituo 40 vinavyotoa huduma za Afya,kati ya vituo hivyo Hospitali moja,vituo vya Afya vinne na Zahanati 35    

Imeandaliwa na

Farida mussa

Kitengo cha TEHAMA Manispaa

Agosti 16,2019