WATENDAJI WAPEWA SIKU 14 KUWASAKA WANAFUNZI WASIORIPOTI KIDATO CHA KWANZA

Tarehe ya kuwekwa: March 1st, 2023

Mkuu wa Wilaya ya Songea  Kapenjama  Ndile ametoa siku 14 kwa Maafisa Watendaji Kata, Mitaa na Maafisa Elimu Kata kuhakikisha wanakamilisha zoezi la kuwapata wanafunzi  469 wasioripoti shule   ikiwa wanafunzi  6343 waliochaguliwa kujiunga kidato kwanza 2023  kati ya hao ni  Wanafunzi   5874  wameripoti shule.

Amewataka kutumia mbinu shirikishi  jamii  ili kufanikisha kuwapata wananfunzi wote ambao bado hawajaripoti  pamoja na kubaini changamoto ambazo zinapelekea Mwanafunzi kutoripoti shule kwa wakati husika.

Aidha, ametoa Rai kwa Wataalamu hao kuwajibika kila mtu katika eneo lake na ameahidi kutoa Zawadi kwa Mtendaji  yeyote atakaye fanikisha kwa asilimia 100% kusimamia zoezi la wananfunzi wasioripoti shuleni.

Kauli hiyo imetamkwa leo katika kikao kazi cha Maafisa Watendaji Kata 21, Maafisa Watendaji wa Mitaa 95, Maafisa Elimu Kata 21, Wakuu wa Idara kilichofanyika katika ukumbi wa Shule ya Wasichana Songea kwa lengo la kufanya ufuatiliaji wa wanafunzi wa kidato cha kwanza ambao wameripoti na wasioripoti Manispaa ya Songea.

Mhe. Ndile amewataka Watendaji wa   Serikali za Mitaa kuandaa Mpango shirikishi ambao utatekelezeka  katika kufanikisha  utoaji  wa chakula shuleni ambapo amesema ni asilimia 63%  za shule ambazo zinatoa chakula  kwa wananfunzi wakati wa masomo.

Kwa upande wa Afisa Elimu Sekondari Janeth Moyo amesema Mansipaa ya Songea imeweka Mkakati wa kuhakikisha  wanatumia mbinu mbalimbali ikiwemo na sheria ndogo ili kufanikisha kuwapata wanafuzi wasioripoti.

IMEANDALIWA NA,

AMINA PILLY

KITENGO CHA MAWASILIANO SERIKALINI.