WATOTO 32272 WACHANJWA CHANJO YA SURUA SAWA NA 112%

Tarehe ya kuwekwa: February 29th, 2024

Halmashauri ya Manispaa ya Songea imetekeleza zoezi la utoaji wa chanjo ya ugonjwa wa Surua katika vituo 40  vinatoa huduma za chanjo ambapo  jumla wa watoto 32,272 wenye  umri wa miezi 9 hadi 59 wamechanjwa.

Lengo hilo limefanikiwa kwa kufikia asilimia 112%  ambapo  makisio ya awali ya Halmashauri ilikuwa  jumla ya walengwa wa uchanjaji 28,794  kuanzia umri wa  miezi 9 hadi 59, ikiwa mafanikio hayo yametokana na uhamasishaji wa jamii kupitia  Redio, Matangazo, vipeperushi  pamoja na wahudumu wa Afya ngazi ya jamii

Hayo yamejiri wakati wa kikao cha tathimini cha kamati za huduma za  Afya Wilaya kilichofanyika tarehe 28 Februari 2024 katika ukumbi wa Manispaa ya Songea, kwa lengo la kufanya tathimini ya  utekelezaji wa  Chanjo ya Surua Manispaa ya Songea.

Akizungumza Mkuu wa Wilaya ya Songea  Mheshimiwa Kapenjama Ndile, ametoa wito kwa wataalamu kufuata utaratibu wa kufanyika kwa vikao ambavyo vipo kwa mujibu wa kanuni na taratibu za Serikali ambapo  hufanyika  kwa ajili ya kupata taarifa na ufanisi wa utekelezaji wa shughuli za Serikali.

Ndile alibainisha kuwa, Wizara ya Afya, OR - TAMISEMI kwa kushirikiana na wadau wa maendeleo imeendesha kampeni ya Kitaifa ya kutoa Chanjo ya Surua kwa watoto wote walio katika umri wa miezi 9 hadi 59

Aidha,   Kampeni  hii  ilifanyika Nchi nzima kuanzia Tarehe 15-18 Febuari, 2024 katika Vituo vya kutolea huduma za chanjo na maeneo maalumu yaliyoandaliwa ambapo  kwa Halmashauri ya Manispaa ya Songea zoezi la utoaji wa chanjo limetekelezwa katika mitaa yote 95.

IMEANDALIWA NA;

AMINA PILLY;

KITENGO CHA MAWASILIANO SERIKALINI.