WAZIRI Mkuu kuanza ziara ya kikazi mkoani Ruvuma

Tarehe ya kuwekwa: December 31st, 2018

Waziri Mkuu wa Tanzania Kassim Majaliwa anatarajia kuanza ziara ya siku nne katika mkoa wa Ruvuma.

Mkuu wa Mkoa wa Ruvuma  Christina Mndeme akizungumza na wanahabari ofisini kwake mjini Songea,amesema Waziri Mkuu anatarajia kuwasili katika uwanja wa ndege wa Songea Januari pili,2019,majira ya saa kumi jioni.

Kwa mujibu wa Mkuu wa Mkoa wa Ruvuma,mara baada ya Waziri Mkuu kuwasili mjini Songea  atasomewa taarifa ya maendeleo ya Mkoa wa Ruvuma na Januari tatu ataanza ziara katika Halmashauri ya Wilaya ya Songea.

Akiwa katika Halmashauri hiyo,atakagua miradi ya  soko la mazao OTC Lilambo,miradi ya maji na zanahati katika kijiji cha Lugagara na mradi wa maji katika kijiji cha  Muungano Zomba na hatimaye atafanya mkutano wa hadhara na wananchi katika kijiji cha Lugagara.

Kulingana na ratiba hiyo,Waziri anatarajia kuanza ziara katika Halmashauri ya Wilaya ya Mbinga Januari 4,2019 ambako atakagua miradi na kufanya mkutano na wadau wa zao la kahawa na kufanya mkutano wa hadhara katika kijiji cha Nyoni.

Waziri Mkuu anatarajia kuzindua mashine ya kisasa ya X-Ray katika Hospitali ya Rufaa ya Mkoa wa Ruvuma mjini Songea siku ya Januari 5,2019.

Mndeme ametoa wito kwa wananchi  kujitokeza kwa wingi katika maeneo yote ambayo msafara wa  Waziri Mkuu utapita kuanzia uwanja wa ndege na maeneo mengine katika wilaya ya Songea na Mbinga.

Imeandaliwa na Albano Midelo

Afisa Habari Songea Songea

Desemba 31,2018