Wizara ya Afya yapambana na Maradhi yatokanayo na Magonjwa yasiyopewa kipaumbele nchini Tanzania

Tarehe ya kuwekwa: September 16th, 2020

Wizara ya Afya, Maendeleo ya jamii,  Jinsia, Wazee na Watoto imekusudia kuanzisha na kuendeleza Mpango wa pamoja (jumuishi) wa kudhibiti magonjwa yaliyokuwa hayapewi  kipaumbele kama (ugonjwa wa minyoo ya tumbo na minyoo ya kichocho)   katika Wilaya zote zilizoathirika na magonjwa hayo nchini Tanzania.

Kauli hiyo imetolewa jana 15.09.2020 na Mratibu wa magonjwa yasiyopewa  kipaumbele Manispaa ya Songea Dr. Broady Komba  kwenye kikao cha  Maafisa watendaji wa kata 21, Wenyeviti wa Mitaa 95  pamoja na wataalamu Sekta ya Elimu Msingi kilichofanyika katika ukumbi wa Manispaa ya Songea.

Broady alisema lengo kuu la Serikali ni kupunguza maradhi yatokanayo na magonjwa yaliyokuwa hayapewi kiupaumbele nchini Tanzania ili kufikia kiwango ambacho si tatizo la afya kwa jamii pamoja na kuhakikisha jamii inakuwa na afya bora na isiyodhoofishwa na maradhi.

Alisema Manispaa ya Songea inakusudia kugawa dawa za minyoo ya tumbo na minyoo ya kichocho kwa wanafunzi wa shule za Msingi 91 za Manispaa ya Songea, kwa idadi ya wanafunzi wapatao 58,000  kwa wanafunzi wenye umri kuanzia miaka 5-14.

Alifafanua kuwa zoezi hilo linatarajia kufanyika  kuanzia  siku ya ijumaa na  jumatatu  yaani 18-21/2020  kwa usimamizi wa walimu wakuu wa shule husika pamoja na wataalamu wa afya ili kuhakikisha dawa hizo  zinagawiwa vizuri  kwa kila mwanafunzi aliyeandikishwa shule hapo.

Aliwaasa Wenyeviti wa mitaa pamoja na vyombo vya Habari kuendelea  kutoa elimu kwa  jamii/ wazazi / walezi  ili waweze kuwapatia watoto wao  chakula cha kutosha kabla ya  kumeza dawa hizo ili ziweze kufanya kazi vizuri bila kuleta tatizo lolote.

Alizitaja faida za kutumia dawa hizo ni  kuwa na mtoto mwenye afya bora, kuwa na utimamu wa akili na kuongeza ufaulu mzuri wa mtoto pamoja na  husaidia kuondoa maradhi ya kifafa.

 Hakusita kuzitaja baadhi ya dalili ambazo zinaweza kujitokeza kwa mtu  aliyekunywa dawa hizo ni  kutapika, kuhisi kichefuchefu, na kulegea  lakini alisema kuwa  dalili hizo zisiwatie hofu kwani hujitokeza mara chache,  na tatizo likizidi mtoto huyo atapelekwa kituo cha afya kilichojirani kwa msaada Zaidi.

Aidha baada ya maelekezo hayo kwa Wenyeviti wa Mitaa na Watendaji wa Kata, yatatolewa tena maelekezo kwa Wakuu na walimu wa afya wa  shule za  Msingi zote ili kuwajengea uwezo wa kiutendaji Zaidi.

IMETAYARISHWA NA;

AMINA PILLY, 

AFISA HABARI MANISPAA YA SONGEA.

16.09.2020