YALIYOJILI SIKU YA WAZEE DUNIANI

Tarehe ya kuwekwa: October 2nd, 2022

Siku ya wazee Duniani huadhimishwa kila ifikapo tarehe 01 Oktoba  ya kila mwaka kwa ajili ya  kukumbushana  umuhimu  wa wazee ili waweze kuwa  na maisha  bora yenye kuleta matumaini aidha wanapokuwa wamestaafu au wanapokuwa na umri mkubwa.

Katika kutekeleza maadhimisho hayo  Halmshauri ya Manispaa ya Songea ilifanikiwa kuandaa  maadhimisho yaliyofanyika katika uwanja wa majimaji na kuhudhuriwa na wananchi  pamoja na wadau wa wazee kwa lengo la kukuza ustawi wa wazee  na kuondoa  ubaguzi  dhidi  yao.

 Mgeni rasmi katika maaadhimisho hayo alikuwa Mkuu wa Mkoa wa Ruvuma ambaye aliwakilkishwa na Mkuu wa Wilaya ya Songea Pololet Kamando Mgema ambaye alianza kwa kusema “ Ni wajibu wa kila mwanajamii  katika  kuwalinda na kuwathamini  wazee ambao ni kundi muhimu katika jamii ambapo wanahitaji kulindwa na kuheshimiwa.”

Pololet aliongeza kuwa malengo makubwa ya Sera ni kuhikikisha  kuwa wazee wanathaminiwa na kutunzwa na jamii na  kushirikishwa katika  shughuli za kijamii  kwa maendeleo ya Taifa letu pamoja na kuwapatia huduma bora  za afya hususani katika  vituo vya afya, Zahanati, Hasptali, na kuahakikisha wanapewa haki kwa wazee kabla ya wengine.

Alisema Serikali ipo kwenye hatua mbalimbali  za kuhakikisha wazee  wote wanawekwa kwenye Mfumo  wa malipo ya Pensheni pamoja kutunga  sheria ya haki za wazee na kuhakikisha yanaundwa mabaraza ya wazee kila Mkoa ambayo yanasaidia kuwaunganisha wazee

Alitoa agizo kwa  Mkurugenzi wa Manispaa pamoja na Mganga Mkuu Hospitali ya Mkoa Ruvuma kuhakikisha anasimamia na kuboresha kuhusu upatikanaji wa dawa kwa wazee ambao ni hazina kwa Taifa, pamoja na kuhakisha inatengwa bajeti kwa ajili ya maadhimisho ya siku ya wazee duniani.

Ikisomwa Risala kutoka baraza huru la wazee ambayo walisema “ Maadhimisho ya siku ya wazee duniani ni utekelezaji wa azimio la umoja wa Mataifa namba 45/106/1990 kwalengo la kuelimisha, kujenga amasa na uelewa katika kuboresha naman ya upatikanaji wa huduma bora na ustawi wa wazee katika jamii.

Kauli mbiu ya mwaka 2022 ni   “USTAHIMILIVU NA MICHANGO YA WAZEE NI MUHIMU KWA MAENDELEO YA TAIFA.”

Na;

AMINA  PILLY