ZIWA Nyasa ni Mgodi wa vivutio vya Uwekezaji na Utalii

Tarehe ya kuwekwa: August 28th, 2018

WIZARA ya Maliasili na Utalii imesema  vivutio vya utalii vilivyopo katika ziwa Nyasa havipatikani katika sehemu nyingine yoyote Duniani  hivyo serikali  na wadau wengine  wanatakiwa kufungua milango ya Utalii  mwambao mwa ziwa hilo hali itakayovutia wawekezaji  katika sekta ya Utalii .

Tanzania  inashika nafasi  ya pili Duniani  kwa kuwa na vivutio  vingi vya Utalii,hata hivyo bado vivutio vingi havijaibuliwa na kuendelezwa .Ziwa Nyasa  limezungukwa na nchi tatu ambazo ni Tanzania, Malawi na Msumbiji, ziwa hilo lina  urefu wa karibu  kilometa  1000  na upana  mkubwa wa kilometa  80 ambapo upana mdogo ni kilometa 15.

uwepo wa Ziwa Nyasa ambalo  linapatikana Kusini – Magharibi mwa Jamhuri ya Muungano wa Tanzania,Ziwa Nyasa ni la tisa kwa ukubwa duniani,ni la tatu kwa ukubwa barani Afrika.

Ziwa hilo lina kina cha kati ya mita 426 na 758 na hii ni kutokana na kupitiwa na bonde la ufa. Kwa upande wa Tanzania mito mingi inapatikana ikitokea wilaya ya Nyasa katika safu za milima ya Livingstone, mito hiyo ni Ruhuhu, Lumeme, Ruhekei,Lwika,Mbamba Bay,Likumbo na  Chiwindi ambayo huingiza maji ndani ya Ziwa Nyasa.

Kwa mujibu wa Afisa Maliasili na Utalii wa wilayani Nyasa,ziwa Nyasa ni kuvutio kikubwa cha Utalii kanda ya kusini kwa kuwa limesheheni vitu vingi ndani yake na tabia tofauti ukilinganisha na maziwa mengine ya hapa nchini na duniani kote.

“Baadhi ya tabia za ziwa hili ni uwepo wa maji meupe na maangavu eneo lote la ziwa na mawe marefu ambayo yanajulikana kwa majina ya hia na mala yanayobeba sifa tofauti’’,anasema Bugingo.

Tabia nyingine za Ziwa hilo anazitaja kuwa ni mawimbi makubwa, fukwe nzuri na zenye sifa  tofauti,  mawe kuonekana  kama sakafu eneo la Chiwindi, fukwe zenye udongo wa mfinyanzi, kina cha maji kuwa kifupi kwa umbali mrefu na mchanga mdogo ambao watu wa kale walitumia kusugulia meno ili yawe meupe hasa katika fukwe za Mtipwili.

Kulingana na utafiti ambao ulifanywa na SADC  ziwa Nyasa lina kiasi cha tani 165,000 za samaki jambo muhimu hapa ni kuhakikisha vivutio vya utalii vilivyopo katika ziwa Nyasa vinatangazwa na kuendelezwa hali ambayo itachangia kuinua uchumi wa  wiaya zinazozunguka ziwa hilo ikiwemo Wilaya ya Nyasa mkoani Ruvuma.

Imeandikwa na Albano Midelo